March 11, 2016
Rotokawau ingoa tuuturu
He tohu whenua ka mohiotia ookawatia ki tana iingoa Maori.
Ko Rotokawau tera kei Whanganui aa kei te mahue ki tahaki te karanga Paakeha o Viriginia Lake.
Hai taa kaumaatua John Maihi ko taua roto te waahi i hui ai nga Maori o te rohe ka mutu kua whakaae te Kaunihera o Whanganui ki te tohutohu a te iwi kainga o Tuupoho kia aro atu ki te iingoa o Rotokawau.
Ruu whenua
Kua ruu kaha te whenua paatata atu ki te Moana o Raukawa aa e hia rau taangata kua rongo i taua ruu i te Ika a Maaui me te Waipounamu.
11 kiromita noa iho te hoohonutanga, 4 ira 6 te kaha, 53 kiromita ki te raawhiti o te taone o Seddon rohe o Waiharakeke.
Pire Reo Maori
Kua whakapai ake i te pire reo Maori engari he mahi ano ma nga komiti paaremata kia tau ai te pire.
Koia te tirohanga a Peeni Henare mema paaremata o Taamaki Makaurau.
Kua tae ki te pire nei ki tana paanuitanga tuarua i tenei wiki whai muri i etahi huringa na minita Te Ururoa Flavell ratou ko nga mema o te komiti whiriwhiri i whakarite.
Hai taa Henare ano, me whakarite hoki nga whaainga tauwhaaiti mo te pire reo Maori pera i te tukuruatanga pea o nga kaikorero reo a nga tau tekau e tuu mai nei.
Rangitahua paatai
Me pehea a Aotearoa e whakahaere ana i te rohe moana ka raahuitia ki nga moutere o Rangitahua?
Koia te paatai a Aotearoa Tuatahi waihoki kei te kii a Shane Jones maangai mo te kaawana o Aotearoa i te Moana Nui a Kiwa, tera pea me mahi tahi ki nga moutere tuutata kia whakaruruhau i taua waahi motuhake.
Rima tekau miriona taara kei te utua e Aotearoa ki te whakahaere i nga rohe hao ika ki te whaanuitanga o te Moana Nui a Kiwa.
Ihumaatao poroteehi
A te Raatapu nei ka poroteehi te roopu e mautohe ana i te mahinga whakatuutuu whare ki Ihumaatao, Maangere takiwaa o Taamaki Makaurau.
Ka whakaritea ki reira he taura a tangata ki te whakanui i taua whenua.
E mea ana te hunga whakahee ka whakatuma taua mahi whakatuu whare i te papakaainga o Ihumaatao me te whenua koohatu o Otuataua tae atu ki te taiao whaanui.
Ko te aronga tika
He tohu te whakataunga rangimaarie o te raruraru i Onepuu inanahi.
kei te ako nga Piriihimana me pehea te whakapaa mai ki a tatou te Maori.
Koia taa kairangahau Maori a Steve Elers, me tana kii, mehemea ki te paatootoo mai he piriihimana ki tana kuaha, kia Maori te ahua o te aapiha e paatootoo ai.
Hei taa Elers ano, tokoiti noa iho nga aapiha takawaenga Maori i tenei waa.
Copyright © 2016, UMA Broadcasting Ltd: www.waateanews.com