June 14, 2017
He aha te huarahi whakamua mo Ngaapuhi?
He aha te huarahi whakamua mo Ngaapuhi?
Kei te whakahee Te Kotahitanga o nga Hapu o Ngapuhi i te whakatau a te Peremia kia noho tahi ratou ko Tuhoronuku ki te kimi rangaawatea e ahu whakamua ai te tono raupatu a Ngapuhi. Kei te kokiri petihana ke Te Kotahitanga hei waitohu ma nga uri o Ngapuhi, ko te kaupapa kia marama te peremia kei te takahi ia i te wahanga tuarua o te Tiriti o Waitangi i tana ukui atu i te awhina a te Kawanatanga. Hei taa Pita Tipene o Te Kotahitanga, me mahi tahi tonu a Ngapuhi me te Kawanatanga ki te whakatutuki i te tono raupatu nei.
He hui nui ka tuu apopo
Hei apopo ka hui nga iwi o Tauranga Moana ki te whiriwhiri i te hiahia o nga iwi o Pare Hauraki kia whakamanatia to ratou whai waahi ki te moana o Tauranga i roto i taa ratou whakataunga tiriti. Hei taa te kaumatua o Tauranga Moana, a Hauata Palmer, kei te hee tenei hiahia o nga iwi o Pare Hauraki, a, no nga iwi o Tauranga te moutere o Matakana, ehara i nga iwi o Hauraki.
He toki maori a Tipene Watene
I maharatia te raa i mate ai a Tipene Waatene, mangai paaremata oo mua no Ngaati Maru me Te Arawa, i roto i te whare paaremata inanahi. I mate i tana tari i te whare paaremata e rima tekau tau ki muri. Nei ra a Nanaia Mahuta, mangai mo Hauraki Waikato.
Te whare Hundertwasser kua whai hua
Kua whai te Whare Toi Hunderwasser i te toru ira kati rima miriona taara i te Lotteries Commission, no reira, ka tuu taua whare inaianei. Ka timata nga kaimahi ki te whakatuu i te whare nei ki Whangaarei, nei ra a Pat Hohepa, mangai mo tenei kaupapa.
Kaua e poroa te koomihana maori
E karanga ana te roopu Kakariki ki Te Reo Tataki o Aotearoa kia whakaaro ano ratou i taa ratou whakatau kia poroa te turanga o te Komihana Maori. Hei taa te kaiarahi i Nga Kakariki a Metiria Turei, ahakoa e kii ana Te Reo Tataki ka uu pono tonu ratou ki te whakapaaho hotaka Maori, me pehea ke ra hoki e tutuki ai tera korero, mena ra kaore he komihana Maori i waenganui i a ratou.
He puutea mo ngaa rauemi maori
Kua whakaritea he putea hou hei hanga rauemi reo Maori hou ma nga KKM. Tuia ki tena, kua whakaritea he putea hei whakapakari i nga Poari o nga KKM. Hei taa Raawiri Wright, toihau tuarua o te runanganui o ngaa kura kaupapa Maori o te motu, he pai te putea nei, engari, me tika te whakapau.
Copyright © 2017, UMA Broadcasting Ltd: www.waateanews.com