May 10, 2017
Ka kookiri whakamua ngaa kura hourua
Ka kookiri whakamua ngaa kura hourua
Kaore he tukinga whakaaro, kaore he tukinga tikanga. Koira te whakatau a Willie Jackson o Reipa. Ko tetahi o nga kaupapa here a Reipa mo te kowhiringa pooti, kia whakakorengia nga kura hourua, engari, he kura hourua to Jackson ki Nga Whare Waatea Marae i Mangere. Hei taana, i korero ia ki te kaiarahi i a Reipa, ki a Andrew Little, mo tenei take, i mua i tana hononga ki te roopu.
He whare herehere maori pea?
Kua tae ki te wa e whakatuuria ai he Whare Herehere mo te Maori anake. Koira te karanga a Kelvin Davis, kaitoorangapuu o te roopu Reipa. Hei taana, na te tokomaha o nga mauhere Maori i penei ai tana karanga.
Ko Piripi Walker hei whakakii i te turanga matua?
Ka pai a Piripi Walker o Ngati Raukawa hei tumu whakarae hou o Whakaata Maori. Katahi ano a Paora Maxwell ka riihaina, a, hei taa Henare Kiingi, tautohito o te ao Papaho, kua roa a Walker e whawhai ana mo te reo, mai ra ano i ona ra i te roopu Nga Kaiwhakapumau, ki te Reo Irirangi o te Upoko o te Ika, tae noa mai ki taana noho ki te Poari o Whakaata Maori.
Ko Sharon Hawke te mangai hou
Kua tohua a Sharon Hawke hei toihau o te Poari Whenua Taapui o Orakei, ara, te Orakei Reserves Board, a, hei taana, tera pea ka whai waahi a Ngati Whatua Orakei ki te whakauu i tona mana ki nga whenua kei raro i te maru o taua Poari, inaianei. No Ngati Whatua me te Kaunihera o Tamaki nga mangai o te Poari nei, a, ko nga whenua taapui o Takaparawha, Okahu me Pourewa e whakahaerehia ana e ratou. Hei taa Hawke, katoa katoa enei whenua taapui, he waahi tumatanui mo te katoa, engari, no Ngati Whatua te mana.
Me tuu te poowhiri ki te marae o Te Tii
Ahakoa te kaha kuuwaawaa, te kaha kaumingomingo o nga whakaritenga i runga i te marae o Te Tii i Waitangi i tenei tau, hei taa tetahi o nga rangatira o te marae, a Kingi Taurua, me tuu tonu te powhiri ki runga i taua marae a tera tau, kaua e haria ki te papa o te Tiriti.
He kaahui ako hou
E ono tekau oorau o nga kura o te motu kua whakatuu kahui ako i roto i o ratou hapori. Koira taa te Minita i nga take Matauranga, taa Hekia Parata. Ko te tikanga o nga kahui ako nei, he tuhono i nga kura koohungahunga, nga kura tuatahi me nga kura tuarua o tetahi hapori, kia marama tiiahoaho nei te ara matauranga hei takahi ma tena tamaiti, ma tena tamaiti. Ina kitea he whawharua i roto i taua ara matauranga, ka whangai putea te tahuhu o te matauranga hei tiriwaa i taua whawharua ra. Hei taa Parata, ina te tini o nga hua e puta ana i te whakatuunga mai o nga kahui ako
Copyright © 2017, UMA Broadcasting Ltd: www.waateanews.com