April 30, 2018
Whakahē Te Ohu Kaimoana i a Voices From the Sea
Whakahē Te Ohu Kaimoana i a Voices From the Sea
Kei te whakahē Te Ohu Kaimoana i te pukapuka hou e whakahau ana kia panonitia te pūnaha rawa ika o tēnei whenua. Hei tā te tāhūhū rangapū o Te Ohu Kaimoana a Dion Tuuta, he maha ngā kōrero kūare kei roto i te pukapuka Voices From the Sea nā Raewyn Peart, kaore hoki he mana, he kiko o ngā kōrero o roto. Hei tā te pukapuka nei, nā te ture rawa ika Māori o te tau kotahi mano, iwa rau, iwa tekau mā rua kua uaua rawa te pūnaha rawa ika o tēnei whenua. Hei tā Tuuta, kua mahi tahi rātou ko te Karauna ki te manaaki i ngā rawa ika mā ngā whakatipuranga. Hei tā te kaituhi a Raewyn Peart, kei te matangurunguru ia ki nga whakahē a Te Ohu Kaimoana.
Heamana Tuarua o te Rūnanga Kōhanga Reo
He wā whakahirahira tēnei mō ngā Kōhanga reo. Koira tā te Heamana tuarua hou o te Rūnanga Kōhanga Reo o te Motu, tā Daniel Proctor. Hei tāna, ahakoa ngā ainga o ngā tau tata nei, kua puta te ihu o te Rūnanga Kōhanga Reo i te raru ki te ao mārama, ā, kei te anga whakamua kia koke whakamua.
Karangatanga ohotata ki Rotorua
Kua utaina atu he karangatanga ohotata ki runga i te rohe o Rotorua. I roto i te hītori huarere o Rotorua, kaore anō kia pēnei rawa te kaha o te heke o te ua ki te rohe. Toru tekau ngā whare o te hapori o Ngongotahaa kua waipukehia rawatia, a, kua huarangatia ngā kainoho ki waahi kē kia ora ai rātou. He maha ngā awa o te rohe kua kōrengarenga mai i ngā pari tahataha kia waipukehia tēna huarahi, tēna papa kainga, tēna papa tākaro o te rohe.
Whakatū tāngata Ngā Kākāriki ki Te Onewa
Ahakoa kei te whakatū tangata Ngā Kākāriki ki te kōwhiringa pooti motuhake ki te rohe o Te Onewa – Onepoto, hei tā te Peremia, a Jacinda Ardern, ehara tēna i te raru mo Reipa. Kei te whakataetae a Shanan Halbert o Reipa ki a Dan Bidois o Nahinara mo taua tūru torangapū, engari, kua tukuna e Ngā Kākāriki a Rebekah Jaung ki roto i te whakataetae. Hei tā te kaiarahi takirua i Ngā Kākāriki, a Marama Davidson, ka whakatairanga ia i ngā take hauora, ngā take whare, ngā take mō te wai me ngā take huarahi.
Copyright © 2018, UMA Broadcasting Ltd: www.waateanews.com