April 10, 2018
Whakawhiti ki te rārangi pooti Māori
Whakawhiti ki te rārangi pooti Māori
Kei te akiaki te Perehitini o te RTM i ngā kaipooti Māori kia whakawhiti ki te rārangi pooti Māori. Koinei te wā e taea ai e ngā kaipooti Māori te whakawhiti i te rārangi pooti auraki ki te rārangi pooti Māori, ā, e kore tēnei kōwhiringa e hua ake anō mo te rima tau. Hei tā Che Wilson, mena i te rārangi pooti Māori te katoa o ngā Māori, ka whai tātou i te tekau mā waru tūru ki roto i te whare pāremata.
Hoko te Kāwanatanga i te Pakihi Pātara Wai Poroti
Kua hoko te Kāwanatanga i te Pakihi Pātara Wai, i te tango wai i te puna o Poroti i Whangārei. Kua roa te hapu e whai mana ana ki taua puna, e whakahē ana i te mahi a taua pakihi. Hei tā te Minita i ngā Take Tiriti a Andrew Little, kua hokona hoki e te Kāwanatanga te whā heketea whenua e karapoti ana i te puna, ā, ka tiakina taua whenua hei whakatau i te kokoraho Tiriti a te hapu a tōna wā.
Te āwha ki Tāmaki Makaurau
I tino haukerekerehia a Tāmaki Makaurau e te āwha i te pō nei. He rākau kua hinga, he hiko kua weto, he huarahi kua waipuketia. Hei tā ngā ratonga o Tāmaki, e kore ngā Heketoru kawe pāhihi i te moana o Waitematā e tere i te moana i te rā nei, ka raru hoki ētahi o ngā rerenga i te taunga waka rererangi o Tāmaki.
Whakarite whare mo te hunga kainga kore
Kei te tautoko tētahi o ngā taiki ngāpara mo te hunga pōhara, i te whakatau a te Whakakotahitanga o te Ao kia whakarite whare i tēnei whenua mō tērā hunga. Hei tā Hurimoana Dennis o Te Puea Marae, kua roa rātou e kimi whare ana mo te hunga pōhara i raro i tā rātou hōtaka Manaaki Tāngata, ā, hei tāna, he raru nui te kainga koretanga, he raru e kore e rongoa wawe i te Minita hou i ngā take Whare, i a Phil Twyford.
Whakahaere Pakirehua Whānau Ora
Hei tā te Minita Whānau Ora a Peeni Henare, kei te whakahaerehia he pakirehua e pā ana ki a Whānau Ora i tēnei wā, engari, ko tētahi o ngā tohutohu mo te pakirehua nei, kia āta titiro me pēhea te whakamāhorahora atu i ngā mātāpono o Whānau Ora ki ētahi atu ratonga hauora o te motu. Ko te hunga whakahaere i te pakirehua, ko Caren Rangi, he kaitatau, ko Tania Hodges, toihau o mua o Whānau Ora i Waikato, roia Te Rau Kupenga, toihau o Te Rūnanga o Otakou a Donna Matahaere-Atariki, Kim Ngarimu hekeretari o Te Puni kokiri i te wā e waihangatia ana a Whānau Ora, me Brenda Steele o te Poari Hapori o te Uru o Tāmaki.
Whakahoki te mana ki ngā Kaunihera-a-rohe
Kei te kimi huarahi te Minita i ngā Kaunihera-a-Rohe a Nanaia Mahuta, e taea anō ai e ngā Kaunihera ngā kaupapa oranga pāpori i roto i o rātou hapori te ārahi. Kei mua i te pire e kiia nei, ko te Local Government (Community Well-being) Amendment Bill, i te aroaro o te whare pāremata i tēnei wiki, ko tana whainga, kia whakahoki i te mana ki ngā Kaunihera-a-rohe, ki te tono pūtea kia tū ai he whare pukapuka hou, puna kaukau hou, papa tākaro hou rānei ki waenganui i ngā hapori.
Pūtea tāpiri ki a Waikato-Tainui me Ngāi Tahu
Kua mana te pūtea tāpiri ki a Waikato-Tainui me Ngāi Tahu. Nā te Minita i ngā Take Tiriti, na Andrew Little, te $16.6 miriona taara ki a Waikato-Tainui me te $18.7 miriona taara ki a Ngāi Tahu i pānui mai i te wiki nei, whai muri iho i te ekenga o te uara o ngā whakataunga tiriti katoa ki tua atu i te kotahi piriona taara.
Copyright © 2018, UMA Broadcasting Ltd: www.waateanews.com