September 10, 2018
Takahi i ngā mātāpono o te Tiriti o Waitangi
Takahi i ngā mātāpono o te Tiriti o Waitangi
Hei tā ngā kitenga a te Roopu Whakamana i te Tiriti, i tino takahi te Karauna i ngā mātāpono o te TOW i roto i Te Rohe Pōtae i ngā tau o te kotahi mano, waru rau, waru tekau. I katia taua rohe ki ngā Pākehā e Ngāti Maniapoto i taua wā, nā wai rā, ka whakaekea te rohe o Waikato e ngā hoia o te Karauna i te tau kotahi mano, waru rau, waru tekau mā toru. Hei tā te Roopu Whakamana, i raupatu whenua te Karauna i roto i Te Rohe Pōtae, he hiahia nō rātou ki te hanga ara tereina mā reira. I mea a Ngāti Maniapoto ki a rātou kia ūpono ki te Tiriti, engari, i māminga, i tinihanga te Karauna i te Tiriti me te iwi kia riro ai i a rātou te whenua.
Te whāinga o Whānau Ora
Hei tā te māreikura nānā nei a whānau ora i whakatū, he uaua tonu ki ētahi o ngā ratonga whānau ora te whakaū i te whakaaro, ko ngā whānau te matua i roto i ngā ariā katoa o te kaupapa. Hei tā Kahurangi Tariana Turia, ko te tino whāinga o whānau ora, ko te whakahoki i te tino rangatiratanga ki ngā whānau kia riro mā rātou o rātou anamata e waihanga. Kei Tāmaki Makaurau a Turia mō te hui nui a ngā ratonga whānau ora o te Ika-a-Maui, a, hei tāna, me maumahara ngā ratonga, ehara ko rātou te matū o te kaupapa, engari, ko ngā whānau e āwhinatia ana e rātou.
Kelvin Davis Minita Paihere Karauna Māori
Kua mana te ingoa hou o te tūranga minita o Kelvin Davis, kua mana hoki te whakatūnga mai o tōna tari hou. Ka kiia tōna tūranga minita, ko te Crown-Māori Partnership, arā, Minita Paihere Karauna Māori, a, kua whakatūria he tari hei tautoko i ngā kawenga o taua tūranga. Hei tā te peremia a Jacinda Ardern, i panonitia te ingoa kia mārama ai te marea ki te tikanga o taua tūranga, arā, kia ārahi i ngā iwi kua tutuki kē ā rātou whakataunga tiriti, ki te takahi ngātahi me te Karauna i te ara ki mua.
Kimi huarahi mō ngā kaimahi Whānau Ora
Hei tā te Minita Whānau Ora a Peeni Henare, e hiahia ana ia ki te kimi huarahi e hihiri anō ai te ngoi o ngā kaimahi whānau ora kua ngēngē, kua ruha i roto i ngā tau. He mea whakaputa tēnei kōrero e te Minita nei, i te hui a Te Pou Matakana mā ngā ratonga whānau ora o te Ika-a-Maui. Hei tāna, ko ngā kaimahi e haere atu nei ki te mura o te ahi ki te āwhina me te tautoko i ngā whānau, ngā pou o te kaupapa, engari, me whānui o rātou pūkenga, whānui ake i ō ngā kaimahi auraki. Hei tāna, he uaua te pupuri i ēnei kaimahi nei, nā te uaua o te mahi.
Heke a Marama Fox i te tūranga kaiārahi mo te Paati Māori
Ahakoa kua heke iho ia i te tūranga kaiarahi i te RTM, hei tā Mārama Fox, ko tana whāinga nui tonu, kia hāpai i te iwi Māori kia tutuki ai ngā wawata mō te tino rangatiratanga. I heke a Fox i tērā wiki, ko te rarunga o tana pakihi te take. Hei tāna, kei te tino harikoa ia ki ngā mahi nui i oti i te RTM, i ōna tau e iwa i te tēpū o te Kāwanatanga.
Tautoko a Jacinda Ardern i Te Wiki o te reo Māori
Kua tae atu te peremia a Jacinda Ardern ki te Kura Tuarua o Te Whanganui-a-Tara ki te whakaatu i tāna tautoko i te wiki o te reo Māori. I ūtoka i te kura nei te reo Māori hei ako mā āna tauira katoa i ngā tau tata nei. Hei tā te peremia, ko tētahi o ōna pouritanga nui, kaore ia i ako i te reo i te kura. Hei tāna, kua oti kē i a rāua ko tana tāne a Clark Gayford tētahi rautaki te waihanga e mōhio ai tā rāua tamāhine a Neve Te Aroha ki te reo. I whakahaere whakatūtū taunaki i te reo ki te tapawhā o Te Ngākau i Te Whanganui-a-Tara inanahi.
Copyright © 2018, UMA Broadcasting Ltd: www.waateanews.com