Inanahi i tū te pānuitanga tuatahi mō te Pire Fisheries Amendment ki te Whare Pāremata, ā, i whakaae te nuinga o ngā mema pāremata kia kōkirihia.
Nā te nui o ngā whakahē i ngā hapori huri noa i te motu, i whakakore te Minita mō ngā Take Moana, a Shane Jones, i te wāhanga o te pire e whakaae ai kia pupuri tonu ngā kaihao ika i ngā ika nonohi.
E ai ki a Minita Jones, kāore anō te pire nei kia toka, ā, hei te wā ka tae atu ki te kōmiti whiriwhiri, ka wātea te papa hei taunga mō ngā whakaaro o te tūmatanui. Heoi anō, e akiaki ana ia kia kaua te wairua kino e noho hei kaikōkiri i ngā kōrero ka puta.
