Tēnei te reo rāhiri a ngā hoa-toihau o Te Mātāwai, a Brenda Soutar rāua ko Mātai Smith ki a Tākuta Te Anga Nathan (o Te Aupōuri, o Ngāti Porou, o Waikato) hei kaiwhakarite mō te arapāho Māori ki te Pōari o Te Mātāwai.
Kauanuanutia ana ia mō ōna kawenga tautini ki ngā mahi pāpāho Māori, e tō mai ana i ngā wheako pāpāho Māori, rautaki whakawhiti whakaaro me ngā whanaketanga reo Māori i roto ngā tau 30, neke atu. Huihui ēnei wheako katoa, nā ōna mahi hautū i a Whakaata Māori me Te Māngai Pāho hoki, kua pakari te rongo i te reo Māori e horapa ana i Aotearoa.
Hei tā te hoa-toihau, a Brenda, e tō mai ana a Tākuta Nathan i ngā wheako, i ngā mōhiotanga me te manawanui mō te oranga tonutanga o te whakahaumanutanga o te reo Māori mā ngā arapāho Māori.
“Ko tētahi o ngā kaha taimau ka heri mai e Te Anga ko tōna manawa rahi ki te whakapūmau i te reo Māori hei reo kōrero ki ngā pae arapāho katoa. Ko ōna wheako me ōna pūkenga hautū ka whanake ai, ka pakari ai hoki te hononga ki waenganui i ngā arapāho Māori, ngā whakatau haumitanga, me ngā wawata a ngā iwi me ngā hapori mō te reo Māori,” tāna kōrero.
Ko Tākuta Nathan te māngai o Te Ao Pāpāho ki waenganui i te kāhui o Te Reo Tukutuku, ki reira taunaki i ngā reo me ngā tirohanga o ngā kaiwhakapāho Māori me ngā kaiwhakarite mata hoki mā Ngā Aho Whakaari me Te Whakaruruhau o Ngā Reo Irirangi Māori.
“He kawenga nui tēnei tūranga ki ngā tāngata me ngā rōpū e whakapau kaha ana ki te whakapūmau i te kaha o te reo Māori ki ngā pae arapāho. E matapae ana ahau he tika tēnei whakaritenga ki te tautoko i ngā mahi kiritopu, e rongo ai ngā whakaaro, waihoki e rere noa ai te reo ki ngā reanga, ki ngā hapori, ka mutu te reo o ia rā,” tāna kōrero.
