February 20, 2024
Kawe Roes | Kāore anō kia kite ngā hua ki te whakatika i ngā raina rerewē
Kāore anō ngā hua kia puāwai i te whakangao pūtea a te kāwanatanga ki te whakatika i ngā raina tereina a KiwiRail.
Koia te kōrero a tō mātou mātanga tereina o Rails Aotearoa a Kawe Roes, whai muri mai i te whakakorenga o ngā rerenga tereina i Tāmaki Makaurau i tērā wiki, nā te wera o te rā.
Hei tā Roes, ahakoa kua whāngaihia e te kāwanatanga he pūtea āwhina ki a KiwiRail, he roa tonu te wā kia kite i ngā hua e pai ai te haere a ngā tereina pahihi o Tāmaki Makaurau.
E ai ki a Roes, “kua āhua tahuri mai te kāwanatanga ki te whāngai he pūtea kia tika ai ngā raina tereina nei engari ko te raru o ērā whakatikatanga a KiwiRail i te pūtea tautoko a te kāwanatanga kātahi anō ēnei mahi ka tīmata nē i roto i te 10 tau. Nā reira i roto i te 10 tau me 20 tau te tangata otirā te kamupene kia whakatika mai ēnei raina nō reira ko te hua o ngā pūtea 10 tau ki muri kāore anō kia kite mai i tēnei wā nei nā reira koirā te take kei te āhua koretake nei ā tātou tereina i Aotearoa nei.”