November 07, 2023
Kāore he take o te tatau anō: Kelvin Davis
Kua whakatauhia e te mema Pāremata mō te Tai Tokerau mō ngā tau e 9 kua taha ake nei, e Kelvin Davis, kāore ia e tono kia tatauhia anō ngā pōti i tuku mō te rohe, whai muri i te eke a Mariameno Kapa-Kingi i taua tūranga i tēnei tau, mā te 517 pōti.
Ahakoa kua riro kē atu te tūru Te Tai Tokerau, nā tōna tūnga ki te tūranga tuarua o te rārangi mema o te pāti ka hoki tonu a Davis ki te Whare Miere.
I te pō kōwhiringa, i te 14 o Oketopa, i puta kē te ihu a Davis mā ngā pōti e 400, heoi whai muri i te tatau o ngā pōti motuhake i te Paraire kua hori, i huri kē te tai ki a Kapa-Kingi.
I tā mātou hōtaka parakuihi a Paakiwaha i te ata nei, i whāki a Davis kāore he take o te tuku tono ki Te Kaitiaki Take Kōwhiri kia tatauhia anō ngā pōti. Ko tāna mahi ināianei kia whakaāe i te hua o te kōwhiringa pōti, ā, kia waihanga i te Pāti Reipa hei āpitihana kaha ki roto i te Pāremata.