Listen Now: 
October 24, 2023
Ko Bayden Barber ki te kāwanatanga hou: Mātāmua ko te wānanga
Waatea Team
Posted On October 24, 2023
Download AudioKei te tuku whakatūpato te heamana o Te Rūnanga o Ngāti Kahungunu, a Bayden Barber, ki te Pirimia hou me tana kāwanatanga Nāhinara me ACT kia mātāmua tā rātou hui ki ngā iwi o te motu kia mōhio pai rātou ki ngā wawata o te iwi Māori.
Hei tā Barber, ka mahi tahi a Ngāti Kahungunu ki ngā kāwanatanga katoa, ahakoa te tai o ā rātou haki. Heoi, ko tāna ki te Pirimia hou, a Christopher Luxon, mā te kōrero, mā te mōhio, mā te mārama ka whakamua tātou.
Ka kī tonu a Barber, “Nō reira, i tēnei wā he Nāhinara te kāwanatanga, no reira e hīkaka ana ahau ki te kōrero tahi me te Pirimia [me te kī] anei. Anei ngā wawata. Anei ngā wawata o te ao Māori, anei ngā wawata o Ngāti Kahungunu. He aha tā koutou hei āwhina kia tutuki pai ai ērā o ngā wawata? Nō reira, he mahi nui tonu kei mua i te aroaro.”
Hei tā Barber anō, kāore te iwi Māori i rata ki te kī taurangi a Nāhinara māna ngā kaupapa o Te Aka Whai Ora me Ngā Wai e Toru e whakahorohoro, ahakoa te nui o ngā painga ki te iwi.
E ai ki a Barber, “Nō reira, ko tāku nei ki a Nāhinara, ā, me koke tonu i a tātou ērā kaupapa, a Te Aka Whai Ora, ahakoa te kōrero a ACT me Nāhinara kia whakakorea taua kaupapa rā. Ko ahau nei e kī ana mēnā ka pērā, he aha te rongoā? He aha ngā whakautu kei a koutou hei hāpai nei i te āhuatanga o Ngāi Māori ki te hauora, ki Te Mana o te Wai, ērā kaupapa katoa? Nō reira ko au nei kua pīrangi kia koke whakamua ērā kaupapa.”
RELATED NEWS
