August 14, 2018
Whakaroherohea te Tai Tokerau kia 6 ngā wāhanga
Whakaroherohea te Tai Tokerau kia 6 ngā wāhanga
Hei tā tētahi o ngā kaiārahi i te iwi o Ngāti Hine, me mutu tā te Kāwanatanga kōrero ki a Ngāpuhi, anō nei kei raro i te maru o Ngāpuhi ngā iwi me ngā hapū katoa o Te Tai Tokerau. Hei tā Pita Tipene o Ngāti Hine, kaore rātou i te whakaae kia taka iho rātou ki raro i te mana o te tono raupatu a Ngāpuhi. Tuia ki tēnā, hei tāna, ko te hiahia o tōna roopu o Te Kotahitanga, kia whakaroherohea te Tai Tokerau kia ono ngā wāhanga, ā, kia ono ngā whakataunga tiriti mō tēnā wāhanga, mō tēnā wāhanga.
David Seymour Korehāhā ai ngā tūru Māori
Hei tā te kaiārahi i Ngā Kākāriki a Marama Davidson, kei te kōrero te kaiārahi i a ACT a David Seymour mō ngā tūru torangapū Māori me ngā kaipooti Māori, anō nei he taputapu tākaro noa iho. I te hui-a-tau a ACT i ngā rangi whakatā nei, ka puta te whakahau i a Seymour, kua tae ki te wā e korehāhā ai ngā tūru Māori. Hei tā Davidson, i puta tērā whakahau i a Seymour, he hiahia noa iho nōna kia aro te hunga pāpāho ki a ia.
Porotū ngā Kaihautū Pahi o Go Bus
Neke atu i te kotahi rau kaihautū pahi o te Umanga Go Bus i te rohe o Waikato kei te porotū i tēnei rā tae atu ki te waenganui pō. Hei tā rātou, kaore i te pai te utu ki a rātou, kaore hoki i te pai te āhua o a rātou whakaritenga mahi i tēnei wā.
Rangahau a Ngāti Paoa te Whakataunga Tiriti o Marutūāhu
Hei tā te Ūpoko o te ringa pakihi o Ngāti Paoa e hiahia ana rātou ki te āta rangahau, he aha kei roto i te whakataunga tiriti a Marutūāhu i mua i tā rātou whakatau mēnā rā ka hono ki ngā iwi o te kāhui o Marutūāhu. Hei tā Brett Rhind, ko te kore mōhio he aha kei roto, te take e horokukū nei, e whakatūpato nei a Ngāti Paoa. I tēnei wā, ko te ngahere o Maramarua me ngā whenua i te rohe o Takarunga, arā, ngā whenua o te Ope Tauā Moana kei roto i te whakataunga, engari, hei tā Rhind, e hiahia ana a Ngāti Paoa kia ū ngā iwi o te kāhui o Marutūāhu ki ngā tikanga Māori, kia pai ai, kia tika ai, te tohatohatanga o ngā rawa o te whakataunga.
Copyright © 2018, UMA Broadcasting Ltd: www.waateanews.com