October 18, 2023
He rongoā mō te Waitematā
Kua oti i a Watercare tana mahi taupua hei whakaiti i te tukunga para ki te Waitematā, whai muri i te turakitanga o tētehi harihari paru matua i Panēra, i Tāmaki Makaurau, i tērā marama.
E ai ki te māngai nō Watercare, a Mark Bourne, kua whakatū ngā papu e ono me ngā kōrere hoki ki runga i te rori o Hato Hori kia whakahuri ai te ara o te paru i te wāhanga kōrere kua tanuku. I mua i te waihangatanga o aua papu hou nei, e waru miriona rite te rahi o te paru e rere ana ki te wai, ia te rā, ia te rā.
Heoi tonu, ko te inoi a Bourne ki ngā kainoho o Tāmaki kia kaua rātou e tuku i ngā muku pēpi, i ngā rāpihi rānei ki te whare paku, nā runga i te tūraru ka purua ngā kōrere taupua. Ki te pērā, ka ngākieki anō te paru ki te Waitematā.
He whakatūpato hoki tō Bourne ki te taone: Ka tū tonu te rāhui kaukau, eke pōti hoki a Ngāti Whātua ki runga i te moana. Kāore anō te paru i te Waitematā kia mahea atu, ā, kei te mahitahi a Watercare me ngā mana whenua o te Waitematā ki te whakamātatau i te wai ia te rā, ia te rā. Mā te pūmanawa tautono o Safeswim e mōhio ai ngā kainoho o Tāmaki ā whea haumaru ai te hokinga ki te wai.
Hei tā Bourne, ināianei kei te huri te kamupene nei ki te whakawātea i ngā kōwhatu nui e kati tonu ana i te harihari paru matua i Panēra, kātahi ka whakatikatikahia te kōrere.