August 30, 2023
Kua eke Tangaroa a Kiri Nathan
I eke panuku, i eke Tangaroa te whakaaturanga kākahu a Kiri Nathan inanahi, ko te whakatuwheratanga tērā o Kahuria, te Wiki o Te Kākahu o Aotearoa 2023.
Koia nei te kī a te kaiwhakaahua a Te Rawhitiroa Bosch, nāna te whakaaturanga i hopu. Ko Nathan te kaihoahoa Māori tuatahi ki te whakatuwhera i te wiki whakanui nei, ā, i reira te tini me te mano o te ao Māori kia kite atu i ana kākahu.
Hei tā Bosch, āpiti atu ngā waiata a Ria Hall, me te whakaaturanga a te rōpū a Hawaiki Tū, ā, ka hurō ai te whare. “I tino rongo i te wairua, i tino rongo i te ātaahua o tō tātou ahurea Māori. Me kī hoki, tino rongo i te whakahīhī – whakahīhī pai, whakahīhī Māori nei – i te rangatira o te tū o Ngāi tātou te iwi Māori i roto i tēnei, tēnei o nga wiki whakatairanga kākahu. He whakamīharo. Nō reira, koia tētahi tauira o te tini tauira o ngā tini kaupapa nōku te waimārie ka whai wāhi au ki ēnei kaupapa.”