February 15, 2023
He nui te āwangawanga ki Te Tai Rāwhiti
Kei te mimiti haere ngā waipuke i Te Tai Rāwhiti, heoi kei te tōtō tonu te ngākau i te āmaimai me te āwangawanga. Koia nei te ki a Erana Reedy, kaihautū o Te Reo Irirangi o Ngāti Porou, whai muri i te takahi a huripari Gabrielle i te takiwā.
Nā te ngahoro o te whenua ki ngā wahi maha i kapi ai ngā ara matua 35 me te ara matua 2, a, kua haukoti ngā ratonga waea, hiko, ipurangi hoki. Tāpiri atu ki tērā, he nui ngā raru a te pūnaha wai Māori ki Tūranga-nui-a-Kiwa, ā, kua tonoa ngā tāngata katoa i reira kia āta whakamahi i te wai ki te tunu kai, ki te paku horoi ranei.
E ai ki a Reedy, kei te pāho tonu Te Reo Irirangi o Ngāti Porou atu i Ruatorea nā te mihini hiko a te teihana, heoi e noho mohoao ana te nuinga o ngā whānau o Te Tai Rāwhiti.
“He nui ngā raru e pā ana ki ngā paipa wai ki te taone o Tūranga-nui-a-Kiwa. Kua ngahorotia ko ētahi o ngā piriti e whakawhiti ana i te rori matua 35, no reira he uaua mō ngā tāngata whakatikatika i te hiko, i te ipurangi hoki, i te haere ki ngā wāhi whakatikatika ai ngā mīhini. Kāore mātou i te tino mōhio ā hea ka hono anō mātou ki te ao whānui.”