Listen Now: 
August 02, 2023
Wetini Mitai-Ngatai: He rā ka tō, he rā ka rere anō
Waatea Team
Posted On August 2, 2023
Download AudioEhara i te mea kua kapi mārika ngā tatau o te kapahaka o Te Matarae i o Rehu.
Koia te kōrero a te kaiarahi o te kapa a Wetini Mitai-Ngatai ki tō mātou hōtaka o Manako i te Tūrei. Hei tāna, kua roa ia e mahi ana i ēnei mahi a kua tae te kaumātuatanga ki a ia.
“Ko tāku kua tae ki te wā kia oti i au taku kapa, kua toru tekau tau kua pau te hau, kua timata te totitoti o ngā waewae me te aha he nui ngā taumahatanga ka ruia ki runga ki tetahi o aku tamariki ki te hari i te rōpū i tēnei wā, kāore anō pea kia rite, a tōna wā pea, ko wai ka mōhio.”
Nō te Rātapu whakamārama ai a Mitai-Ngātai i ana hiahia ki tōna kapa me te tumeke hoki a ētahi i te pōhēhē he hui whakarite kē ia i ngā mahi mō te tau.
“Kei te āhua rongo au i te mamae i te iwi o te kapa, kei te tangi pea ētahi o rātou, me te ohorere a ētahi i tae mai ki te hui i te Rātapu me te whakaaro, e whakareri ana tātou mō tēnei whakataetae e haere ake nei engari kao, katahi te kōrero ka pirangi whakatā ahau i te rōpū.”
Hei tā Mitai-Ngātai tonu kua roa ia e mau ana i ngā mahi kapahaka nei, i a te tau, i a te tau, ā, kua tae te wā kia whai kaupapa anō ia e ngahau ai te ngākau.
“Kua huri aku whakaaro ki aku tamariki mokopuna, kei hea te wāhi mō rātou ki te whai wahi ki ahau ki te tuku i ngā taonga kua tuku atu ki te ao whānui, kua tuku atu ki aku tamariki”
Hei tā Mitai Ngatai tonu ko ngā haerenga ki Matatini noaiho ka whakamoea, ā, ka ngana tonu rātou ki te whai i ngā kaupapa kāore e whakapakaru ai te tuara.
“Kua mutu te haere ki ngā Matatini nātemea kua ngēngē…ka taea tonu ngā haere ki rāwahi, tera pea he tū whakaari ki te papa whakarewa kei reira pea kia māmā ai te mahi.”
Ahakoa te nui o te pouri, hei tā Mitai Ngatai, kei te hari tonu ia i te mōhio, kua tutuki i a ia, te ōhaki o Irirangi Tiakiawa i tau ki runga ki a ia i tōna taiohitanga.
“Nā taku Pāpā ahau i whiu ki te waha o te awa ki reira kaukau ai, tekau mā whitu aku tau i taua wā, katoa o ngā taemahatanga i ruia ki runga i ahau, ka taea e au te kī kua oti tau na hiahia (ki) te whakaako i te whānau, ā, kua puta whānuitia ki te ao kapa, ki te ao Māori. ”
Ahakoa ka whakamoea pea ngā haerenga ki Te Matatini i tēnei wā, kei te whakapono ia ka kore e pēra mō ake tonu atu.
“Mā tētahi pea o aku tama, tamariki rānei, ka mutu, mā tētahi o rātou a Matarae e hari ā tona wā, i tēnei wā, kaore rātou i te tino kaha, tera pea taku tama ake, ko Te Po, kei a ia ngā pukenga ngā pūmanawa ā tona wā, engari i tēnei wā kei te āhua whakamā pea ki te tū mai ki tēra turanga, heoi anō kei a rātou a tōna wā.”
RELATED NEWS
