Listen Now: 
Te Whawhai i Ngā Mahi Taihara ki Tāmaki
Hei taa ngā roopu Te Pae Oranga e whā o Tāmaki, kei te whai hua ā rātou mahi i roto i te whawhai kia heke ngā tatauranga taihara i roto o Tāmaki, no reira, me pumau tā rātou putea tautoko. I hui rātou ki runga i te marae o Ōrākei i te Rāhoroi ki te wānanga me te arotake i ā rātou mahi. Hei taa Shane White o te marae o Hoani Waititi, ko te ngako o tā rātou kaupapa he whakatiaho i te māramatanga ki runga i ngā taiharatanga o te tangata kia mohio ai ia ki ona hē, kātahi ka tino tautoko i taua tangata kia kite ai ia i te ara tika hei whai māna. Hei tāna, e whai hua ana ngā mahi a ngā Pae nei, na te mea, he mea waihanga e te Māori kia hāngai pū ai ki te Māori.
Tūwhiti i te Hopo
Hei taa tētahi mātanga mātauranga Māori, tokomaha ngā kaiako e tika ana kia āta whai atu i te kōrero rā mo te tūwhiti i te hopo, kia pai ai tā rātou whakaako i ngā tamariki Māori. E mahi ana a Rosalie Reiri mo Core Education, te roopu i whakahaere hui nui i Tāmaki i tērā wiki, ko tōna kotahi mano rima rau kaiako i reira. Hei tāna, kei te huri ngā waiaro ki ngā kaupapa Māori me te whakaako i ngā tamariki Māori, engari, ko ētahi kaiako e mataku ana ki te whakaako i nga tamariki Māori, i ngā kaupapa Māori rānei pēnei i te reo, na te mea, kāore rātou e mōhio ana me pēhea.
Whakamana i te Reo Māori ki Pōneke
Kua roa nei ngā iwi kei Te Whanganui-a-Tara e akiaki ana i te kaunihera-ā-rohe o Pōneke, ki te āta whakamana i a rātou te reo Māori ki roto i āna mahi katoa, me te aha, i whai hua te whakapaunga werawera a tērā hunga i ngā marama kua hori.
E ai ki a Matiu Tahi, e tika ana kia whakahōnoretia te hunga pēnei me te kaumātua nei a Billy Taite, tētahi o ngā tino kaikōkiri i ngā take reo Māori i a ia e ora ana.
Whakarerea i ngā Kura Māori, Whakatū Kura Auraki
He mea mōhio nō te Tāhuhu o te Mātauranga ki ngā painga nui e puta mai ana i ngā kura Māori, nō reira, kua tae mai te wā ki te whakatū i ēnei tūmomo kura puta noa i te motu.
Hei taa Pem Bird, tumuaki kura Māori, kua tae mai pea te wā kia tū mai ēnei kura hei kura auraki, a, ki ōna whakaaro, me whakarerea i ngā wāhi ako pēra ki ngā Kura Kaupapa Māori, Kura-ā-Iwi hoki.
!["p_facebook"]("/site/uma/images/story_img/facebook.jpg")
& !["p_twitter"]("/site/uma/images/story_img/twitter.jpg")
Copyright © 2018, UMA Broadcasting Ltd: www.waateanews.com
