July 05, 2023
He wānanga maramataka mā ngā wāhine
E pōwhiritia ana koutou, wāhine mā, ki te whakakotahi atu ki tētehi wānanga e tiro ana ki te awenga o te marama ki te ao o te wahine.
Koia nei te kī a te mātanga maramataka, a Heeni Hoterene, i mua i tana kaupapa Matariki ka tū ki Paihia ā tērā Wenerei, ā te 12 o Hūrae.
Hei tā Hoterene, he wānanga tēnei e akiaki ai a wāhine mā ki te tutuki i ā rātou wawata mā te whai hoki i te maramataka Māori.
Hei tāna anō, “Ko tāku turanga ki te karangangia ki nga wāhine kia haere mai, whai wā ki te noho ngātahi. Ka taea e ngā wāhine tēnā pea kua hanga tīmata kē te whai atu i te āhuatanga o te maramataka i roto i ngā tau e rua pea, neke atu, kia haere mai ki te noho tahi, kia whiuwhiu i ngā pātai ki ahau, kia wānangahia, kia rongo i ngā kōrero reka. Engari i te mutunga o te rā, ko tāku ki te poipoia ngā wāhine, kia tutuki ā tātou wawata.”
Ka haere te hui ahurei o Matariki Pēwhairangi tae ana ki te 22 o Hūrae. Mō ngā pitopito, tirohia te pae tukutuku matarikinz.com
- Whakarongo ki te uiui katoa ki konei.