June 13, 2023
He wānanga mō te āpōpō o Ruapehu
E koa ana ngā hapū o Ruapehu i tā rātou hui tahi ki te Minita Whanake ā-Rohe, a Kiritapu Allen, i te pō Rātapu i Tūrangi. Hei tā tō rātou māngai kōrero, hei tā Hayden Turoa, ko te oranga tonutanga o tō rātou tupuna a Ruapehu te whāinga matua.
Nā te mūhoretanga o te kamupene whakahaere i ngā whira retireti o te maunga i tērā tau, i kī ai te kāwanatanga ka kowhiria e rātou tētahi kaiwhakahaere hou, ā, kāore anō tērā kōrero kia whakamanahia.
Hei tā Turoa, ahakoa te tōmuri hoki o te kāwanatanga, kei reira tonu rātou nga uri ki te whakakōrero i ngā hiahia o tō rātou tūpuna hei painga mōna, hei painga mō ngā hapū, hei painga hoki mo ngā tini kaitoro ki ōna whīra retireti.
“Ka ora pai tō tātou maunga, kei reira te pūtake o tā mātou nei hiahia, kei hawea e te kāwanatanga i te mana o te maunga, oti noa ko te ahi kā roa, ko ngā karanga hapū, ko ngā whatinga toka o Ruapehu e muramura tonu nei. Koia te pūtake o tō mātou nei mahi.”