May 17, 2023
He pōrangi te poro pūtea: Ria Hall
E karanga ana tētahi kaiwaiata Māori kia oho ake te koromatua o Tāmaki Makaurau a Wayne Brown kia kaua e poroa katoatia e ia te tahua pūtea mā ngā mahi toi ki te tāone nui rawa atu o te motu.
Koia te kōrero a Ria Hall, whai muri i te kī a te kaunihera o Tamaki Makaurau, kei whakatahangia e rātou ngā tahua putea toi, hei utu i te $295 miriona tara e noho whārua nei i ā rātou pukapuka pūtea.
Hei tā Hall, me oho mārika te koromatua. “Pōrangi, pōrangi ake nei, heahea ake nei, ērā momo mahinga āna, ā, i runga i te mea, kei roto i te ao toi, ko te oranga tonutanga o ngā tāngata katoa, ā-hinengaro, ā-tinana, ā-wairua, aha atu rānei. He oranganui kei roto i te ao toi. Kāore ōna take kia poroa katoatia ngā tahua pūtea mō te ao toi, he raru nui tēnā ki a au.”