Listen Now: 
Ko te Karere nui o te Wiki kua pahure nei ko te take o te tāhae tamariki o te rōpū whakahaere i ngā take rangatahi a Oranga Tamariki.
Hei tā Hone Harawira, ehara i te mea ko Oranga Tamariki, ko Tāhae Tamariki kē.
Koirā te āhua o ngā kōrero o te matua nei, anō hoki te tokomaha o te Iwi Māori, whai muri i te huhua o ngā raruraru kua pā atu ki te tari nei a Oranga Tamariki āmuri i te rīpoata i puta mai i a Newsroom e kapohia ana ngā rautaki rerekē, kino hoki, mo te kapohanga tamariki mā runga i ngā take mōrearea, otirā, kei raro te Iwi Māori e putu ana i roto i ēnei tatauranga. Kua taupatupatu, kua tautohetohe hoki te kaupapa nei i ngā wiki kua pahure.
E ai ki te kaumātua a Des Ratima, kei te tōtara wāhi rua tonu te iwi me te Kāwanatanga ki raro i tēnei take.
Ngāti Rangi – Rukutea te Mana
He wiki hari, he wiki hīkaka mo te iwi o Ngāti Rangi whai muri i to rātou pānuitanga tuatoru ki te whakatau i to rātou kokoraho tiriti – Rukutea te Mana. A te mārama e tū mai nei hau atu ai te iwi nei ki te whare mīere ki Te Whanganui-a-Tara.
Hei tā Whetu Moatane nō te iwi o Ngāti Rangi, i whakaeke te iwi whānui o Ngāti Rangi, me ngā whanaunga o te Awa o Whanganui, ki Te Ūpoko o te Ika, ki te whakanui, me te whakatau i tō rātou kerēme, a Rukutea te Mana.
Kai hauora, kai pai
E whakahau ana ngā mātanga hauora, inā te nui o ngā hua ka whakawhiwhia e te tangata inā tahuri atu ai ia ki te kai pai, ki te tiaki hoki i tōnā tinana
E tika ana tēnei kōrero whai muri i te whakaputanga mai a te Kāwanatanga ki te kī ake, he hiahia nō rātou ki te whakakore i ngā inu nui te huka.
Koirā hoki tētahi kaupapa nui e kōkirihia ana e Jeanine Tamati Elliffe, Kaiārahi hauora Māori i Te Whare Wānanga o Waitaha. Hei tā Elliffe, me hikina e tātou te mānuka kua takotohia e o tātou tīpuna. He maha ngā huanga pai mō te kai pai, kai hauora mo te tīnana me te wairua o te tangata.
Ngā Take Hākinakina
Ki ngā take nui i roto i te ao Hākinakina mō tērā wiki, i whakakorengia te kēmu nui mō Aotearoa i roto i ngā mahi o te kirikiti i tērā wiki mā runga i te kaha marangai ki Ingarangi.
E ai ki te pito o ngā kōrero Hākinakina, a Ken Eruera, me tūpato te kapa Pōtae Pango i tō rātou kēmu e whai ake nei i waenganui i a Īnia, whai muri i te kapa o Ahitereiria, me tō rātou kēmu i ngaro i waenganui i a rātou me Īnia.
!["p_facebook"]("/site/uma/images/story_img/facebook.jpg")
& !["p_twitter"]("/site/uma/images/story_img/twitter.jpg")
Copyright © 2019, UMA Broadcasting Ltd: www.waateanews.com
RELATED NEWS
