Taupokihia te pūtea mako taurewa

Kaore e kore ka harikoa ngā whānau kei raro i ngā peehitanga o te hunga e kiia ana he mako taurewa, ki te whakatau a te Kāwanatanga kia taupokihia te nui o te pūtea e taea ai te tono i taua momo hunga. Hei tā Daryl Evans o te Ratonga Penapena Pūtea o Māngere, kua whai hua tēnei momo taupokitanga i ngā whenua o tāwāhi. Hei tā te peremia a Jacinda Ardern rāua ko te Minita i ngā take Kiritaki Hoko, a Kris Fafoi, kei te whakarewa kaupapa te Kāwanatanga e mutu ai tā ngā roopu mako taurewa uta i te kotahi oorau hua moni ki runga i ngā pūtea e tukuna atu ana e rātou ki ngā whānau.

Housing First ki Rotorua

Kei te whai whakaaro a Rotorua ki te whakatū i te kaupapa Housing First ki te takiwā hei rongoā mō te kainga koretanga i roto o Rotorua. I tae-a-tinana atu te Minita Whakawhanake Māori a Nanaia Mahuta ki Rotorua inanahi, ki te whakatairanga i te rā kainga kore puta noa i te ao. Hei tāna, kua whai hua te kaupapa Housing First i roto i ngā whenua o te ao, nō reira, mokori anō kia tōia mai ki tēnei whenua. Ka riro mā LinkPeople, Lifewise me Te Taumata o Ngāti Whakaue te kaupapa Housing First e whakahaere ki roto o Rotorua. E ai ki ngā tatauranga, 48 ngā tāngata kainga kore i Rotorua.

Te whakahoutanga i te ture tuao

E tomina ana te Minita i ngā take Tuao, a Peeni Henare, kia whai waahi te iwi Māori ki ngā kōrero mō te whakahoutanga i te ture tuao. Hei tā Henare, kaore e kore ka pā te whakahoutanga nei ki te Māori, ina rā hoki, ngā iwi Māori e mahi ana i roto i te rāngai tuao, pēnei i ngā iwi kua oti kē i a rātou ā rātou tono raupatu te whakatau. E ono piriona tāra te uara o te rāngai tuao, engari, kaore ngā mātāpono o te iwi Māori i te tino kitea, i te tino whāia i roto i taua rāngai.

Follow us on &

Copyright © 2018, UMA Broadcasting Ltd: www.waateanews.com