Listen Now: 
Pakari ana te tū a tēnei Kāwanatanga
Hei tā te kaiārahi i Ngā Kākāriki a Mārama Davidson, e pakari ana te tū a tēnei Kāwanatanga, nā te māhaki o ngā roopu e toru ki te kimi i te huarahi e ū atu ai o rātou ki te waahi kotahi, otirā, ki te waahi e whakaae ai rātou ki a rātou. I tū kotahi a Reipa, Ngā Kākāriki me Aotearoa Tuatahi ki mua i tētahi whakaminenga i tēnei wiki, a, hei tā Davidson, i whakatairanga rātou i ngā hua kua puta i a rātou ki ngā take whare, ki ngā ratonga pāpori, ki te taiao me te maha noa atu o ngā kaupapa, ahakoa te rerekētanga o ngā roopu e toru o tēnei Kāwanatanga.
125 tau whakamanatanga pooti waahine
Hei tā te Perēhitini o te Roopu Wāhine Māori Toko i te Ora, a Prue Kapua, me whakanui ngā wahine Māori i te mahi nui a o rātou kuia i whai mana ai ngā wāhine katoa o tēnei whenua ki te pooti. No te rā inanahi, i whakamaharatia ai, i whakamānawatia ai te kotahi rau, rua tekau mā rima tau i te whakamanatanga o te pooti wāhine ki tēnei whenua. Hei tā Kapua, nā ngā wahine Māori i rerekē ai te āhua o te tohe kia whai mana ngā wāhine ki te pooti i tēnei whenua, i te tohe i roto i ēra atu whenua, koia i tuatahi ai tātou ki te hāpai i te hiahia o ngā wāhine kia pooti rātou.
Donna Awatere Huata Komihana Hauwaro Māori
Hei tā te Ūpoko o te Tūāpapa Hauwaro Māori a Tā Mark Solomon, he mea tino nui rawa atu kia whai waahi ngā whakaaro o te iwi Māori ki ngā taukumekumetanga e pā ana ki te mahi a Aotearoa hei whakatau i ngā take Āhuarangi. Kua whakatūria e te tūāpapa nei, he tari motuhake mō tētahi komihana hauwaro Māori, anā, ko te kaitorangapu o mua, a Donna Awatere Huata te komihana e kōrerohia nei. E ai ki a Tā Mark, ahakoa e whakarite ana te Kāwanatanga i tāna rautaki āhuarangi i tēnei wā, he rerekē tā te Māori titiro, tō te Māori whakaaro, me aha hei tiaki i te mana o Papatūānuku rāua ko Ranginui.
Whakataetae Te Maia o Parekarangi
Ahakoa kua hipa te wiki o te reo Māori, e haere tonu ana te whakataetae i whakarewahia ai i te wiki o te reo Māori, hei whakatītina i ngā Rangatahi kei roto i ngā whare whakaahuru e noho ana ki te ako i te reo me ngā tikanga. Ka tū te wāhanga whakamutunga o te whakataetae Te Maia o Parekarangi i te rā nei. Hei tā te Tumu whakahaere Māori hou o te Manatū Oranga Tamariki, a, Michael Moses, ko tōna whitu tekau ōrau o ngā rangatahi kei roto i ngā whare whakaahuru nei mō te takahi ture, he Māori, a, he mea nui kia mōhio rātou ko wai mā rātou kia kite ai rātou i te ara whakamua mō rātou. Hei tāna, ko te reo te rongoā mō te tokomaha o rātou.
Raru te mana o ngā Kura Hourua
Hei tā tētahi o ngā kaihāpai i ngā kura hourua, mēnā ka komokomotia ngā kura hourua ki raro i ngā whakaritenga mō ngā kura o te Kāwanatanga, ka raru te mana o ngā kura hourua. Katahi anō te tono a te Kura o Waatea i te Tonga o Tāmaki, me te Kura Tūranga Tangata Rite i Tūranga ka whakaaetia kia noho rāua ki raro i te maru o ngā kura o te Kāwanatanga. Ko ērā atu kura hourua kua tono kia tū kura motuhake rātou. Hei tā Graeme Osborne o te roopu E Tipu E Rea, i te whai hua ngā tamariki Māori i ngā kura hourua, engari, mēnā ka komokomotia ki waenganui i ēra atu kura, ka raru te kaupapa.
!["p_facebook"]("/site/uma/images/story_img/facebook.jpg")
& !["p_twitter"]("/site/uma/images/story_img/twitter.jpg")
Copyright © 2018, UMA Broadcasting Ltd: www.waateanews.com
RELATED NEWS
