Listen Now: 
September 07, 2018
Whakataunga Tiriti a Te Rohe o Te Wairoa
Waatea Team
Posted On September 7, 2018
Whakataunga Tiriti a Te Rohe o Te Wairoa
Kua puta te ihu o te pire e whakatau ana i te kokoraho tiriti a Te Rohe o Te Wairoa i tana pānuitanga whakamutunga i te whare pāremata. Koia te whakataunga nui rawa tuaono o te katoa o ngā whakataunga, mohoa nei. Hei tā te Minita i ngā take Titiriti a Andrew Little, mā tēnei whakataunga, kotahi rau miriona taara te nui, ka kitea he oranga hou mō ngā iwi me ngā hapū o Te Wairoa.
Pakanga o Te Ngutu o te Manu
Koinei te rā whakamutunga o ngā kaupapa i haere i te wiki nei hei tohu i te pakanga o Te Ngutu o te Manu i te tonga o Taranaki. Koia te pakanga i ārahi nei a Titokowaru i ngā tauā Māori ki ngā hoia a Thomas McDonald. Kotahi rau, rima tekau tau kua hipa i taua wā rā.
Kurutetenga Te Kooti Rikirangi
Kei te whakahaerehia he kurutetenga ki Te Papa āpōpō, ko te kaupapa, ko Te Kooti Rikirangi me ngā pōhēhētanga e pā ana ki a ia. Hei tā ngā Pākeha i te wā i a Te Kooti, he kaurimarima, he ika haehae kupenga, nō reira, me aruaru, me patu, engari, hei tā ngā Māori, he poropiti. Hei tā tētahi o ōna uri a Rikirangi Moeau, ko te mea pai o te kurutetenga nei, nā Te Tarahiti o Te Tira Whakaari me Te Tarahiti o Ngā Uri o Te Kooti Rikirangi i whakatū, ko te noho tahi a ngā whānau me ngā mātanga, ki te wānanga, ko wai a Te Kooti.
Whakatū rāhui ki te maunga o Motutere
Kei te titiro tētahi iwi no Hauraki ki te katinga o te toka nui o Uluru i Ahitereiria hei tauira whai mā rātou. Kua whakatū rāhui a Ngāti Huarere ki runga i te maunga o Motutere, whai muri iho i ngā matenga e rua i reira i ngā wiki nei. He pari kei taua maunga e kaha nei te pikia e te marea. Hei tā Wanda Brljevich, māngai mō te iwi, e tūmeke ana te iwi i te rongo kōrero, kei taua pari ētahi taura, ētahi here hoki kua tino whakamaua ki te mata o taua pari. Hei tāna, he waahi tūmataiti tērā, nā kona anō tā te iwi whakatū rāhui.
Whakatika i tā tātou pūnaha ture
Kei te riro mā ngā hui whakawā a ngā iwi me ngā hapori e ārahi te kimihanga o te rongoā hei whakatikatika i tā tātou pūnaha ture o tēnei whenua. Koirā tā Julia Whaipooti, māngai ture, whai muri iho i Te Pae Oranga wānanga i tū ki Ahuriri i te wiki nei. I reira ngā Pirihimana, ngā roopu Māori me ngā māngai ture, a, hei tā Whaipooti, kei te whai hua te whakaaro kia tukuna mā te iwi, mā te hapori rānei te hunga takahi ture tātākimōrī e whakatika.
!["p_facebook"]("/site/uma/images/story_img/facebook.jpg")
& !["p_twitter"]("/site/uma/images/story_img/twitter.jpg")
Copyright © 2018, UMA Broadcasting Ltd: www.waateanews.com
RELATED NEWS
