Listen Now: 
Mihi a Sonny Tau ki a Andrew Little
Kei te mihi te Ūpoko o te Rūnanga o Ngāpuhi a Sonny Tau ki te Minita i ngā Take Tiriti ki a Andrew Little, mōna i māia ki te takatū ake ki mua i ngā hapū o Ngāpuhi i ngā rangi whakatā nei. I haere a Tau ki ngā hui e rima katoa, nā te mea, koia hoki te ūpoko o Tūhoronuku, te roopu e amo tītoko ana i te tono raupatu a Ngāpuhi. Hei tā Little, kaore te Kāwanatanga i te whakakore i a Tūhoronuku, ahakoa koirā te whakahau i roto i te pūrongo Maranga Mai.
Rīhaina a Vanessa Eparaima nō Waikato River Authority
Kua rīhaina te Ūpoko o Ngāti Raukawa a Vanessa Eparaima i tāna noho ki te Mana o Waikato, arā, ki te Waikato River Authority, he kore nōnā e whakaae ki te kopoutanga o Roger Pikia hei toihau takirua o taua roopu. Kei taua roopu a Pikia hei māngai mō ngā iwi o Te Arawa, a, kua riro māna e kawe te tūranga toihau takirua ka whakarērea e Tukoroirangi Morgan a te Noema. E ai ki ngā kōrero, ko te tino pūtake i rīhaina ai a Eparaima, nā te mea, i kī te iwi o Raukawa ki a ia, kaore i te pai kia noho tahi ia me Pikia, i te mea, kei te whakatewhatewhangia a Pikia e te Tari Tara Hāware i tēnei wā.
Pānuitanga Tuatahi o Ngāti Rangi
Hei tā te kaiārahi i te whakataunga tiriti a Ngāti Rangi, me āta whiriwhiri, me āta whakaaroaro, me āta whakatū rautaki ngā iwi i mua i tā rātou noho ki te karauna ki te whakatutuki i wā rātou whakataunga. I tae ake a Ngāti Rangi ki te whare pāremata i tērā wiki mō te pānuitanga tuatahi o tā rātou whakataunga, 17 miriona tāra te uara me te ngahere o Karioi, te mana whakahaere i te awa o Whangaehu, tae atu ki ngā whenua i Waiouru. Hei tā Che Wilson, i mua i tā rātou kōkiri i tā rātou whakataunga, i kōrero a Ngāti Rangi ki ngā iwi kua oti kē i a rātou ā rātou whakataunga, kia mōhio ai a Ngāti Rangi, me aha, me pēhea.
Porotuu a Atlas i Te Tai Tokerau
Kei te porotū tonu ngā kaimahi o te Umanga mahi Raima o Atlas i Te Tai Tokerau. Hei tā Jared Abbott o te Uepū Kaimahi o First Union, e harikoa ana ngā kaimahi i te tautoko mai a te hapori, ina koa, toru mano tāra kua kohaina atu ki a rātou i tēnei wā, i a rātou e porotū ana. Ko te take o tā rātou porotū, e rua ki te whā tāra te iti iho o tā rātou utu, i tērā e tukuna ana ki ngā kaimahi o ngā whare umanga e tūtata ana ki tō rātou.
!["p_facebook"]("/site/uma/images/story_img/facebook.jpg")
& !["p_twitter"]("/site/uma/images/story_img/twitter.jpg")
Copyright © 2018, UMA Broadcasting Ltd: www.waateanews.com
RELATED NEWS
