Raupatu Ngā Whenua o Tauranga

Raupatu Ngā Whenua o Tauranga

Hei tā te toihau o Ngāi Te Rangi a Charlie Tawhiao, he mea whakaweti tōna iwi kia waitohu whakaaetanga ki ngā iwi o Hauraki mō ngā whenua i Tauranga Moana. I ngā wā o mua, arā, i te tau rua mano tekau mā rua me te tau rua mano tekau mā whā, me te mea nei, i te iri te patu ki runga i o rātou ūpoko kia waitohua aua whakaaetanga. I porotū a Ngāi Te Rangi i waho i te whare pāremata i tērā wiki, ki te whakahē i te waitohutanga o te whakataunga tiriti a Hauraki. Hei tā Ngāi Te Rangi, kei te raupatu i ngā whenua o ngā iwi o Tauranga. Heoi, hei tā Hauraki, kei roto aua whenua i ngā whakaaetanga e rua i waitohua i mua nei.

Hauwaro Kore 2050

E rua ngā ihumanea o te Whare Wānanga o Tāmaki e kii ana, he wāhanga nui tō te Māori i roto i te whāinga kia hauwaro kore tātou a te tau 2050. Kei te whakarite hui a Tākuta Julie MacArthur rāua ko Tākuta Steve Matthewman e pā ana ki tēnei kaupapa, a, hei tā McArthur, kua tīmata kē te Māori ki te takahi i te huarahi e hauwaro kore ai ā rātou pakihi, pērā i a Ngāti Tūwharetoa Geothermal Assets i Kawerau me Awarua Synergy i Motupohue.

41% Māngai Poari Taiao he Māori

Hei tā te Minita i ngā take taiao, a Eugenie Sage, whā tekau mā tahi ōrau o ngā māngai o ngā poari taiao o te motu, he Māori, a, neke atu i te haurua o aua poari he wāhine. Rima tekau mā whitu ngā māngai hou kua kopoua e ia ki ngā poari taiao tekau mā rima o te motu kia pai ai te hononga o te hapori ki ngā kaupapa taiao. Ko ētahi o te rima tekau mā whitu nei, ko Taipari Munro me Jaycee Thomas ki te poari taiao o Te Tai Tokerau, Nicola MacDonald o Ngāti Rehua me Ngāti Wai ki te poari ki Tāmaki, Melissa King Howell ki te poari o Waikato, Hinemoa Wanikau rāua ko Georgine Winter ki te poari ki Tongariro / Taupo, tae atu ki te ūpoko o te tarahiti o Te Atiawa ki a Harvey Ruru me Aneika Young ki te poari o te tauihu.

Follow us on &

Copyright © 2018, UMA Broadcasting Ltd: www.waateanews.com

RELATED NEWS

He kōpaki motuhake te pānga Ngā Tamariki Toa Te utu rongoā