July 17, 2018
Whakaaetanga o Ngā Pōtiki me Westpac NZ
Whakaaetanga o Ngā Pōtiki me Westpac NZ
Kua waitohu whakaaetanga te Tarahiti o Ngā Pōtiki a Tamapahore i Tauranga moana ki a Westpac NZ kia whai ai ngā uri o Ngā Pōtiki i o rātou ake whare. Hei tā te toihau o te Tarahiti a Colin Reeder, ka tautoko-a-pūtea a Ngā Pōtiki i ngā uri kia taea ai e rātou o rātou ake whare te hoko, a, ko te waahi ki a Westpac NZ, he tuku pūtea taurewa. Kia piki te uara o te whare i hokona, katahi te uri ka tīmata ki te whakahoki pūtea ki te Tarahiti.
Whakahokia ngā Kōkako ki Pirongia
Kua whakahokia ngā uri o ngā kōkako e whā whakamutunga o Maunga Pirongia i Waikato, ki taua ukaipō o rātou whai muri iho i te rua tekau tau e ngaro ana. I haria ngā kōkako e whā whakamutunga i Pirongia ki te moutere o Tiritiri Matangi i te moana o Hauraki i te ngahuru tau iwa tekau, kia ora ai rātou, otirā, o rātou uri. Inaianei, kei te whakahokia ngā uri ki te maunga o Pirongia whai i muri iho i te patunga o ngā kīrearea i taua maunga, pēnei i ngā kiore, ngā paihamu me ngā wīhara. Rima tekau katoa ngā uri o aua kōkako e whā rā, kua whakahokia ki te maunga.
Te Piriona Taara a Shane Jones ki Te Tai Tokerau
Kua tahuri te Minita Whakawhanake rohe a Shane Jones ki te whakahē i te hunga e kii ana, kei te tuku ia i te nuinga o te piriona taara kei a ia, ki ngā rohe o Te Tai Tokerau. Kei Te Waipounamu a Jones i te wiki nei e hui ana ki ngā rangatira o ngā hapori me ngā rangatira o ngā iwi ki te whakatenatena i a rātou ki te waihanga kaupapa pai hei tautoko māna ki tāna pūtea nui. Hei tāna,ko te hunga e kii ana, kei te tītaha ōna whakaaro ki te tuku pūtea ki te Noota, he hunga nanakia noa iho.
Tētahi i Taitōkaitia e Awanuiarangi Black
Kua tuku amuamu ōkawa tētahi tāne nō Tauranga ki ngā Pirihimana, e kii ana, koia tētahi i taitōkaitia e Awanui Black, kaiarahi i ngā iwi o Tauranga moana, i ngā wā o mua. Hei tāna, nā te putanga mai o te whitiāhua o te pouwaru a Black, arā, a Ani Black me ana whakapae he tangata tūkino tamariki a Black, ka whai kaha ia ki te tuku i tana amuamu ki ngā pirihimana, Hei tāna, e hia kē nei ngā wā i tūkinohia, i taitōkaihia ia e Black, i a ia i tōna whare, a, i kii a Black ki a ia, ina whāki ia, ka raru nui ia.
Ngā Kōhurutanga ki te Rohe o Waikato
E akiaki ana ngā Pirihimana o Waikato i te hunga o te rohe kia whāki kōrero ki a rātou mena rā e mōhio ana rātou ki ētahi taipitopito e pā ana ki ngā kōhurutanga e toru i te takiwā i ngā rā tata nei, katoa katoa, hei tā rātou he kōhurutanga e whai pānga ana ki ngā kēnge. Hei tā ngā Pirihimana, e hiahia ana rātou kia kaua te hunga o Waikato e māharahara, kei te haumaru tonu rātou ahakoa ēnei kōhurutanga kēnge nei.
Copyright © 2018, UMA Broadcasting Ltd: www.waateanews.com