Listen Now: 
16,000 kaipooti Māori kua whakawhiti
I tēnei wā, i roto i te kōwhiringa Māori, tekau mā ono mano kaipooti Māori kua whakawhiti rārangi pooti, i te rārangi pooti Māori ki te rārangi pooti auraki, auraki rānei ki te Māori. I tēnei wā, e kore tātou e whai tūru Māori anō ki roto i te whare pāremata. Hei tā Mandy Bohte o te Komihana Pooti o te motu, ka puta atu rātou ki ngā kaupapa whakanui i a Matariki a ngā wiki e tū mai nei, ki te kōrero ki ngā kaipooti Māori mō tēnei take, hei te tuarua o Hereturikoka ka mutu tēnei kōwhiringa.
Te Tūrū Torangapū o Northcote
He whakataetae nui kei te haere ake ki waenganui i ngā uri Māori e rua e whai ana i te tūrū torangapū o Northcote. Hei tā Reipa, e rua ōrau noa iho a Shanan Halbert kei muri i a Dan Bidois o Nahinara, tekau rā e toe ana ki te rā pooti. I a Jonathan Coleman o Nahinara taua tūru i ngā wā o mua, a, ono mano pooti te nui o tana toanga i roto i taua tūrū i te kōwhiringa pooti mutunga, heoi, kua whaaiti tērā nui inaianei. Hei tā Willie Jackson o Reipa, i puta rāua ko te peremia a Jacinda Ardern ki te takiwā inanahi, ā, e whakapono ana rāua ka taea e Halbert a Bidios te whakahinga.
Cliff Curtis Kea World Class NZ Awards
Kua whakawhiwhia a Cliff Curtis, kaiwhakaari o Te Arawa ki te tohu e kiia nei, ko te Kea World Class New Zealand Awards. Tokoono katoa ngā tāngata kua whakawhiwhia ki taua tohu. Hei tā te tāhūhū rangapū o Kea Global a Craig Donaldson, ko te ngako o tēnei tohu, he whakanui i ngā uri o Aotearoa e kawe ana i tō tātou mana ki ngā atamira o te ao. Ko ēra atu kaiwhiwhi ko Peter Beck o Rocketlab; Mark Sagar, mātanga hangarau; Takuta Delwyn Moller, mātanga putaiao, Mitchell Pham kaiwhakahaere pakihi hangarau me Jennifer Flay, mātanga toi.
Ahurei Kiriata Māori o Te Wairoa
Ka tīmata te Ahurei Kiriata Māori o Te Wairoa āpōpō. Hei tā te toihau takirua o te ahurei a Ratu Tibble, ko te aronga matua o te ahurei ko ngā kiriata poto kua whakaputaina nei e ngā kaihanga kiriata Māori, iwi taketake hoki, a, kei te whakaatūria ngā kiriata pēnei i a Waru me ngā Breaker Upperers. Ko ētahi o ngā kiriata ka kawea ki Kahungunu Marae i Nūhaka hei mātakitaki ma te hunga o reira.
!["p_facebook"]("/site/uma/images/story_img/facebook.jpg")
& !["p_twitter"]("/site/uma/images/story_img/twitter.jpg")
Copyright © 2018, UMA Broadcasting Ltd: www.waateanews.com
RELATED NEWS
