Takahi tikanga ō Ngāti Hikairo

Kei te takahia ngā tikanga tuku iho e ngā iwi e tōhipa ana i tō mātou marae mō ā rātou hui. Koirā te whakatau a Gareth Seymour o te iwi o Ngāti Hikairo i Kāwhia moana. E whai ana a Ngāti Hikairo i tō rātou mana motuhake hei iwi, i waho atu i te hītau o Ngāti Maniapoto me Waikato Tainui, engari, e tū ana o rātou pihi i te whakatau a Waikato Tainui kia tū tā rātou a tērā wiki ki roto i te pāpara kauta o te rohe, kaua ki runga i te marae. Hei tā Gareth Seymour, kei te hē tērā. Hei tā te māngai mō Waikato Tainui a Rahui Papa, kei te pāpara kāuta te hui nā te mea, e pā kaha ana te hui nei ki ngā iwi me ngā hapū maha, ā, nā rātou te whakatau kia tū ki tētahi waahi tūmatanui.

Te mate huka momo rua i ngā tamariki

Kei te piki te kitea o te mate huka momo rua i waenganui i ngā tamariki kei raro iho i te tekau mā rima tau i Tāmaki. Ko taua ahua anō rā, he kaha ake te pā o tēnei mate ki ngā tamariki Māori i ēra atu tamariki. Hei tā Tākuta Craig Jefferies, ko te āhua o te noho me te āhua o te ao o te tamaiti ngā take nui e tūpono pā ai te mate huka nei, engari, i ngā wā o mua, me uaua ka kitea tēnei mate i waenganui i ngā tamariki. Hei tā Jefferies, ko te mōmonatanga tētahi wāhanga nui o te whai waahi o te mate nei ki te tamaiti, ēngari, ara atu anō hoki ētahi āhuatanga hei whakaaro ake.

Te rāngai ahuwhenua ki ngā mahi

He mea nui kia Māori hoki te titiro a te rāngai ahuwhenua ki wā rātou mahi. Koirā tā te Minita Tuarua i ngā Take Ahuwhenua, tā Meka Whaitiri. Katahi anō te Kāwanatanga ka whakatū kaunihera ahuwhenua, tekau mā rima tāngata kei runga, ko tētahi ko te kaiwhakahaere i te Tarahiti o Tuaropaki a Puawai Wereta me te kaiwhakahaere i te Wakatu Incorporation a Miriana Stephens.

160 waka mō te Kīngitanga

Kotahi rau, ono tekau momo waka ka tere i te awa o Waikato i Ngaruawāhia hei ēnei rangi whakatā nei hei whakanui i te huritau kotahi rau, ono tekau o te Kīngitanga. Hei tā Rāhui Papa, māngai mō te Kīngitanga, i whakahaere karakia inanahi i Ngaruawāhia, otirā, i te waahi tonu i whakawahia ai a Potatau Te Wherowhero hei Kīngi Māori tuatahi. Hei tāna, ko te iho matua o te Kīngitanga ko te whakapapa e rangitāmiro ana i ngā iwi katoa. Hei ēnei rangi whakatā nei, ka tū he kapa haka, he roopu waiata, he kai haukai, me te terenga o ngā waka.

Follow us on &

Copyright © 2018, UMA Broadcasting Ltd: www.waateanews.com