December 06, 2017
Wahine Māori ki ngā poari matua o te motu
Wahine Māori ki ngā poari matua o te motu
Hei tā te Toihau o FOMA, me whakangungu tātou i ā tātou wahine Māori kia whai waahi ai rātou ki ngā poari matua o te motu. E ai ki tētahi pūrongo i puta i a Westpac i te wiki nei, ki te whai ngā wāhine i ētahi tūranga rangatira i tēnei whenua, waru rau miriona taara te uara o tēra ki te ohanga o te motu, ia tau. Nō reira, hei tā Traci Houpapa, e ngana ana ia ki te whakatenatena i ngā ūmanga me ngā poari nui o te motu, kia tirohia ake ngā wāhine Māori hei rangatira mō rātou, otirā, hei raukura hoki mō rātou e whanake ai rātou i roto i wā rātou mahi.
Nga pou 40 mo Te Ara o Tāwhaki marae
Kua tīmata i ngā kaiwhakairo o Ngāti Kahungunu i a Te Rangi Robin rāua ko Emanuel Dunn, he kaupapa hou, rua me te haurua tau te roa, e oti ai i a rāua ngā pou whā tekau te whakairo mō Te Ara o Tāwhaki marae i Heretaunga. Hei tā Robin, ko te hiahia o EIT, te waahi kei reira te marae o Te Ara o Tāwhaki, kia haere tonu tā rātou tautoko i ngā kaupapa Māori, otirā, kia kitea mārikatia hoki taua tautoko mā roto atu i te whakatū pou.
Copyright © 2017, UMA Broadcasting Ltd: www.waateanews.com