November 20, 2017
Whakaora i te taupori kūtai o te moana
Whakaora i te taupori kūtai o te moana
Hei aha te tango kūtai i te moana o Hauraki, kei te whakahoki tētahi roopu taiao i te tini o ngā kūtai ki roto i te moana. Ko te matū o tēnei mahi ā te roopu Revive Our Gulf, he whakaora i te taupori kūtai o te moana mā roto atu i te tuku i te rima tekau tana kūtai ki te moana, ā, e mahi tahi ana rātou ko te iwi, ko te Whare Wānanga o Tāmaki me te Manatū Ahumoana. Hei tā Peter van Kampen, kaiputaiao moana, ko te kūtai tētahi o ngā manapou o ngā rauwiringa kaiao i roto i te moana.
Whakatū tūrū Māori i ngā Kaunihera-ā-rohe o te motu
Kei te kōkiri petihana te kahika ō mua o Ngāmotu a Andrew Judd, e panoni ai te Kāwanatanga i ngā tikanga me ngā tukanga mo te whakatū tūru Māori motuhake ki runga i ngā Kaunihera-ā-rohe o te motu. Hei tāna, e whai whakaaro ana ia ki te hari i te Kāwanatanga ki te kooti mō tēnei take. Ko te ngako o tana petihana, kia kaua e riro mā te hāpori whānui o tētahi rohe, te whakatau a tētahi Kaunihera kia whakatū tūru Māori, e pooti.
Kati i ngā whare herehere
Hei tā tētahi o ngā roia Māori rongonui, ki ngā iwi taketake, he taru tawhiti, he tikanga rāwaho tēnei mea te whare herehere, ā, me tīmata tātou o tēnei whenua ki te takahi i te ara e kati haere ai tātou i aua whare. Hei tā Moana Jackson, i ngā iwi taketake o te ao ētahi atu tikanga hei whakatau raruraru, hei whakatika rānei i te hunga kua mahi hē, kua tūkino rānei i tētahi atu, he āhuatanga tino rerekē ki a rātou te mauhere tāngata ki tētahi whare herehere. Hei tā Jackson, he whai take tēnei kōrero, i te mea, i tēnei wā, e rima tekau mā tahi ōrau o ngā mauhere tāne, e ono tekau mā whā ōrau o ngā mauhere wāhine, he Māori.
Copyright © 2017, UMA Broadcasting Ltd: www.waateanews.com