November 13, 2017
Haka ngā kaimahi kāwanatanga
Haka ngā kaimahi kāwanatanga
I whakahaerehia he konohete kapa haka i runga i te marae o Pipitea i ngā rangi whakatā nei kia kite ai te marea i ngā pūkenga haka o ngā kaimahi kāwanatanga me ngā kaimahi kaunihera-ā-rohe o Te Whanganui-ā-Tara. Hei tā te Pou Tikanga Māori o te Tāhūhū o te Mātauranga a Wayne Ngata, ahakoa ehara tēnei i te whakataetae, i reira te wairua whakataetae e rere ana.
Mate huango i ngā hapori Māori
Me whakatū Ratonga Mate Huangō ki ngā marae me ngā whare karakia kia pai ai te patu i taua mate i waenganui i ngā hapori Māori. Mo ia tamaiti Pākeha ka pāngia e te mate huangō, tokorua ke ngā tamariki Māori ka raru. E whakapae ana ngā mātanga hauora, ina haria ngā whakatūpato mo te mate huangō ki ngā marae, tēra pea ka taringa whakarongo ngā whānau Māori.
Whakaae a Ardern ki te TPP
Tēra pea ka mate a Reipa ki te whirinaki atu ki te tautoko a Nāhinara e puta ai te ihu o te kawenata TPP ki roto i tēnei whenua. I whakaae te peremia a Jacinda Ardern kia noho tonu a Aotearoa ki roto i te kāhui whenua o te kawenata TPP i te hui APEC i ngā rangi whakatā nei. Heoi, hei tā Marama Davidson o Ngā Kākāriki, e kore rātou e tautoko i tō rātou hoa Kāwanatanga i a Reipa i roto i tēnei kaupapa, nā te mea, kaore te TPP i te tiaki i te taiao me ngā hapori.
Tūkino i ngā pānui a Huhana Lyndon
E whakapae ana tētahi o ngai tātou e whakataetae ana i te tūru e wātea ana i te Kaunihera-ā-rohe o Whangārei, a Huhana Lyndon, e whai mārire ana ētahi nanakia ki te tūkino i ana pānui whakatairanga. Hei tā Lyndon, i ngā wiki e rua noa nei, e iwa ana pānui whakatairanga kua tūkinohia, e whā o ēra i roto i te hapori o Kāmo. Hei tāna, e whakaarorangi ana ētahi ki te whakararuraru i tana whai i taua tūru i te Kaunihera. Kua tuku kōrero ia ki ngā Pirihimana mo te tūkinotanga o ēnei taputapu āna.
Copyright © 2017, UMA Broadcasting Ltd: www.waateanews.com