Listen Now: 
Hui te Roopu Torangapū Māori
Kua whakatārewahia e te RTM te panonitanga o āna kaiārahi, ki te tau e tū mai nei. I hui te roopu inanahi ki te arotake i ngā hua i puta i te kōwhiringa pooti, ko te ngaro o te tūru o Te Waiariki i a Te Ururoa Flavell te take nui. Hei tā Flavell, ko te pātai nui inaianei, mena rā e hiahia tonu ana te iwi Māori ki te RTM hei reo motuhake mō tātou. Tuia ki tēna, i hui hoki te roopu Mana i ngā rangi whakatā nei ki te whiriwhiri i te āpōpōtanga mō rātou. Hei tā te kaiārahi a Hone Harawira, ka tahuri rātou ki te whakapau kaha ki ngā kaupapa o te hāpori, hei aha rā pea te whai kia uru ki te whare pāremata.
Te tūru o Tāmaki Makaurau
E whakapono ana a Shane Taurima, kaitono mā te RTM i te tūru o Tāmaki Makaurau i tēnei tau, he anamata tō te RTM. I hui te roopu inanahi ki te huritao i a rātou mahi i te kōwhiringa pooti i tēnei tau. Hei tā Taurima, mai rā anō i te mūhoretanga i te kōwhiringa pooti, kua ara ake ngā pou o mua o te RTM ki te whakapakari i te whare mo ngā tau kei mua i te aroaro.
Te rā o Waitangi 2018
E titiro whakamua ana ngā kaiwhakahaere i te rā o Waitangi ki te tau e tū mai nei, me te manako nui, kia tae-ā-tinana te peremia hou ki reira. Kaore te peremia i te rā o Waitangi i tēnei tau, a Bill English i haere ki Waitangi. Hei tā te māngai torangapū mō Tāmaki Makaurau a Peeni Henare, tētahi o ngā māngai o te Tarahiti-ā-Motu o Waitangi, kua kī taurangi a Jacinda Ardern ki a ia, ka tae-ā-tinana ia ki Waitangi a tēra tau.
Whakahe a Whakatōhea i te whakataunga
Kei Awakeri i Whakatāne te Roopu Whakamana i te Tiriti mo te katoa o te wiki nei, e taringa areare ana ki ngā uri o Whakatohea e whakahē ana i te whakataunga a te iwi. Hei tā te tekau mā toru e kōkiri ana i ēnei whakahē, kei te wero rātou i ngā wāhanga rua tekau mā waru o te whakataunga, pēnei i ngā wāhanga o te whakataunga mo te pakanga o Te Tarata me te mauheretanga o Mokomoko i te tau kotahi mano, waru rau, ono tekau mā rima i raupatungia ai o rātou whenua e te Karauna. No te marama o Hereturikoka i waitohua ai e te Minita o te wā, e Christopher Finlayson te whakataunga, kotahi rau miriona tāra te uara.
136 tau te pāhuatanga o Parihaka
No te rā inanahi i whakamaharatia ai te kotahi rau, toru tekau mā ono tau i te pāhuatanga o Parihaka. Kei te kōkiri pire a Marama Davidson o Ngā Kakariki e tū ai te tuarima o Whiringa-ā-rangi, hei rā whakamaumahara, puta noa i te motu. Nā te māngai torangapū o mua o te RTM, nā Marama Fox te pire nei i whakaara ake i ōna wā, engari, kaore i tae ki te pouaka pire o te whare pāremata. Inaianei, e kawe ana a Davidson i te pire e mōhio ai te motu ki te tūkinotanga o Parihaka me te mahi nui a Te Whiti o Rongomai, rāua ko Tohu Kakahi i horapa ai te ātete rongomau, ki te ao.
!["p_facebook"]("/site/uma/images/story_img/facebook.jpg")
& !["p_twitter"]("/site/uma/images/story_img/twitter.jpg")
Copyright © 2017, UMA Broadcasting Ltd: www.waateanews.com
RELATED NEWS
