October 19, 2017
Reipa te Kāwanatanga hou
Reipa te Kawanatanga hou
Kua kopoua e Winston Peters te Kāwanatanga, ko Reipa taua Kāwanatanga. Nō reira, ko Jacinda Ardern te peremia hou o te motu. Ko tāna mahi tuatahi i te rā nei, he kōwhiri i ngā Minita o tana Kāwanatanga. I raro i te whakaaetanga ki a Winston Peters me Aotearoa Tuatahi, e whā ngā tūranga Minita ka haere ki a Aotearoa Tuatahi. I raro i te whakaaetanga ki Ngā Kākāriki, e toru ngā tūranga Minita ka haere ki a rātou, engari, ko aua tūranga Minita rā ka noho ki waho i te Rūnanga Minita o te Kāwanatanga. Hei tā Jacinda Ardern, peremia o te motu, i a rāua ko Winston Peters e whiriwhiri ana i ngā kaupapa here a o rāua roopu i te wiki nei, ka kite rāua i te kaha ōrite o o rāua whakaaro. Hei tāna, ka noho tahi rāua ko Peters ki roto i te Kāwanatanga, ko Peters e whakaako ana i a ia ki ōna mōhiotanga hōhonu e pā ana ki ngā mahi torangapū.
Te whakatau a Bill English
Whakawhiti atu ki a Bill English o Nahinara, hei tāna, nōna te hōnore kia noho hei peremia o te motu. Hei tāna anō, he maha ngā kaupapa nui kua oti i a Nahinara te whakatū i roto i te iwa tau nei e Kāwanatanga ana rātou, hei oranga mo te motu, ā, ko tōna wawata, kia hāpai tonu te peremia hou a Jacinda Ardern i aua kaupapa rā.
Whakatūpato ki te hunga hautū waka
E rere ana te whakatūpato i ngā Pirihimana ki te hunga hautū waka, kia āta haere, kia manawanui hei ēnei rangi whakatā o te Reipa. I tenei wā, toru rau mā tahi tāngata kua mate i ngā huarahi o te motu. I tēnei wā i tēra tau, rua rau, rima tekau mā rima te tatau. Hei tā ngā Pirihimana, he mea nui kia kaua e hautū i te wā e ngēngē ana, ā, kia kaua hoki e pōnānā, inā koa, he pai atu te tae tōmuri atu, i te tae tūpāpaku atu.
Tipu ngā pakihi matihiko Māori
E ai ki te arotaketanga o te rāngai matihiko o Aotearoa, kei te tino tipu ngā pakihi matihiko Māori. E iwa tekau mā whā miriona tāra te uara o ngā pakihi matihiko Māori matua e rima o tēnei whenua, ko te mea nui o ēra, ko Waikato Milking Systems, he pakihi nā Tainui Group Holdings, Ngai Tahu Capital me Pioneer Capital. Ko ēra atu pakihi matihiko Māori nui, ko Straker Translations, Sentient Software and Animation Research, me Whānau Tahi, he pakihi nā Waipareira.
Porotū ki Kaitaia
E taunaki ana te kaiārahi i a Mana, a Hone Harawira i te hunga i aukati i te mahi a ngā kaimahi ki te Pūtahi Hākinakina o Te Hiku i Kaitaia inanahi. Nā Wikatana Popata te roopu porotū nei i ārahi ki taua wāhi mahi i te papa whenua o Te Ahu, te papa whenua i waitohua ai te Tiriti o Waitangi, na te mea, hei tāna, kaore te ūmanga e whakatū ana i taua Pūtahi Hākinakina i kōrero ki ngā tangata whenua i mua i te tīmatanga o ngā mahi. Hei tā Harawira, he pai te whakaaro kia tū taua Pūtahi Hākinakina, engari, ko te Pākeha kei te whakahaere i te kaupapa, kua mahue te Māori ki waho.
Te whakataetae Ipu Ahuwhenua
Kua tahuri Te Kunenga ki Pūrehuroa, arā, a Massey University ki te tautoko-ā-pūtea i te whakataetae Ipu Ahuwhenua. Hei tā te toihau o te whare wānanga, a Jan Thomas, e hiahia ana Te Kunenga ki Pūrehuroa kia kitea mārikatia tā rātou tautoko i te kaupapa.
Copyright © 2017, UMA Broadcasting Ltd: www.waateanews.com