Listen Now: 
Ka pu te ruha ka hao te rangatahi
He wa tenei e kite ai te motu i te whakatinanatanga o te korero ra, ka pu te ruha, ka hao te rangatahi. Koira taa te Minita Kawanatanga o mua o Reipa, taa John Tamihere mo te ekenga o Jacinda Ardern ki te turanga kaiarahi i a Reipa. Hei taa te tahuhu rangapu o Waipareira, kei te rongo ia i te ia o te tai e huri ana ki a Reipa.
Hekenga o nga mema no te roopu Kakariki
Kua totara waahi rua te roopu Kakariki, i te hekenga o Kennedy Graham raua ko David Clendon i o raua turanga i te rarangi ingoa a te roopu. Hei taa raua, kaore e taea e raua a Metiria Turei te tautoko hei kaiarahi inaianei, whai muri iho i tana whaaki i ona hara i tinihanga ra ia i te punaha penihana me te punaha pooti i nga wa o mua. E ai ki nga matanga torangapu, kaore e kore, ka whakarere te tokomaha o nga kaipooti i nga Kakariki mo Reipa, na runga i tenei tuwehewehe a Nga Kakariki.
Waimangu Volcanic Valley
Kua mana te hoko a Ngati Rangitihi me Tuhourangi i te umanga e kiia nei ko te Waimangu Volcanic Valley, tata ana ki Rotorua. Hei taa te Toihau o Te Mana o Ngati Rangitihi a Leith Comer, ka whakawhiti te reehi mo taua whenua i te Papa Atawhai ki a ratou mo te toru tekau ma iwa tau. Hei taana ko te hokotanga o Waimangu tetahi wahanga o taa ratou rautaki pakihi, otira, me taa ratou rautaki ahurea e hono ano ai ratou ki o ratou whenua tupuna o mua.
Nga uri o Te Wairoa
Kei te hui nga uri Maori o Te Wairoa ki te whakarite me te whakatakoto rautaki e pai ai taa ratou whakamahi i te kotahi rau miriona taara ka taka ki o ratou ringaringa i te whakataunga o taa ratou tono raupatu.
Te whakatau a te Kooti Teitei
Kua puta te whakatau a te Kooti Teitei, ko Taa Edward Durie te toihau kotahi anake o te Kaunihera Maori, ahakoa te whawhai a Maanu Paul kia noho tonu ia hei toihau takirua.
!["p_facebook"]("/site/uma/images/story_img/facebook.jpg")
& !["p_twitter"]("/site/uma/images/story_img/twitter.jpg")
Copyright © 2017, UMA Broadcasting Ltd: www.waateanews.com
RELATED NEWS
