May 24, 2017
He po nui mo te whare taonga hou ki Whangarei
He po nui mo te whare taonga hou ki Whangarei
Kei te waiata etahi o nga kaiwaiata rongonui o Te Tai Taitokerau ki roto o Tamaki Makaurau a te po nei. Ko te kaupapa he kohi putea kia tuu ai te whare toi Hundertwasser ki Whangaarei. Me whai taua whare toi i te tekau ma ono miriona taara hei mua i te toru tekau o Pipiri, ki te kore, e kore e whakatuuria. Ko Tina Cross tetahi o nga kaiwaiata rongonui e waiata ana a te po nei ki te Raye Freedman Art Centre i te Kura o Epsom Girls Grammar.
Me anga pehea a Ngati Paoa?
E hiahia ana te roopu Kakariki ki te panoni i etahi ahuatanga o te pire e hoko papa rehia ana ki a Ngati Paoa, kia noho haumaru tonu ai nga manu tata mate me nga maataapono o te Tiriti i roto i nga whakaritenga o taua pire. I puta te ihu o taua pire i tana panuitanga tuarua i te whare paaremata i nga ra tata nei. Koinei hoki te pire e whakawaatea ana i taua papa rehia hei waahi whakatuu whare mo Ngati Paoa. Hei taa te kaiarahi i Nga Kakariki a Metiria Turei, kaore ratou i pooti ki te pire, na te mea, ahakoa e whakaae ana kia whanake te ohanga o te iwi o Ngati Paoa, kei reira tonu etahi maharahara mo te oranga o te taiao.
Te hauora maori
Ko te hauora Maori tetahi rangai nui hei whangai ma te Kawanatanga ki te putea i te ra nei. Koira te whakahau a Tuunuiaarangi McClean o te Ratonga Hapai Te Hauora.
Ngaa kaitiaki mauhere
Kei te wero tetahi kaimahi hapori i te Tonga o Tamaki i te kaupapa e akiaki ana i nga Maori kia tuu tuahangata, ka haere ai ki nga whare herehere mahi ai hei kaitiaki mauhere. Hei taa George Ngatai, mena ka tutungia e tatou te ururua o nga korero, ka tupono tatou ki te pono, ara, kaore nga whare herehere i te paku awhina, i te paku whakaora, i te paku whakaauraki hoki i o tatou uri Maori, no reira, he aha te hua ka puta i te akiaki i a tatou kia haere ki reira mahi ai?
He whare mo aa raatou ake uri
E whakatata ana a Ngati Paoa ki te waa e tutuki ai to ratou moemoeaa ki te whakatuu whare ki runga i to ratou paa kainga o mua. Koira taa te Minita Whakawhanake Maori a Te Ururoa Flavell, whai muri iho i te putanga o te pire e hoko papa rehia ana i Pt England ki a Ngati Paoa, i tana panuitanga tuarua i te whare paaremata. Kaore a Aotearoa Tuatahi me Reipa i pooti whakaae ki te pire na te mea, he papa reehia no te hapori, engari, hei taa Flavell, he kau noa iho kei taua papa i tenei wa.
Ka haere te Whanau Love ki te kooti Piira
E haere ana a Taa Ngatata Love ki te Kooti Piira ki te whakapataritari i te hamene, rua me te haurua tau i hoatu ki a ia mo te raweke i nga putea a te Tarahiti Tekau o Te Whanganui-a-Tara. Hei taa tana tamaahine a Catherine Love, e kii tonu ana tona papa, kaore ia i hapa. Ka tau tenei take ki te Kooti Pira i te ra nei. Kei te whare herehere o Rimutaka a Taa Ngatata Love i tenei wa, e waru tekau oona tau, me te aha, e manauhea ana.
Copyright © 2017, UMA Broadcasting Ltd: www.waateanews.com