Listen Now: 
Te Manatu Oranga Tamariki
E ai ki te perehitini o te Roopu Waahine Maori toko i te Ora, a Prue Kapua, ahakoa te whakatuunga mai o te Manatu hou mo nga tamariki whakaraerae, ara, te Manatu Oranga Tamariki, ehara i te mea ma reira ka puta he rongoaa mo nga raru e pa ana ki aua tamariki me o ratou whanau. Hei taana, kaore nga iwi, nga hapuu me nga whaanau i te tino whai waahi ki nga whakaritenga o taua Manatu, a, katahi ano taua Manatu ka timata ki te tono awhina i nga roopu pera i te Roopu Waahine Maori Toko i te Ora. He aha i kore ai i tono i mua i te whakatuunga mai o te Manatu?
Kua Hamene a Saul Roberts
Kei te hamenetia te tumu whakarae o mua o Te Roopu Taurima O Manukau e te Tari Hara Taaware mo te raweke i te putea a taua roopu. I tuu a Saul Brendan Roberts i roto i te kooti inanahi, a, i hamenetia hoki ia mo te tahae putea i Te Kawerau Iwi Tribal Authority. Hei tera marama tuu atu ano ai ia ki mua i te kooti o Manukau.
Te Takutai Moana
Kua hipa te wa ki nga iwi ki te tapae i aa ratou kokoraho ki nga takutai moana o o ratou na rohe. Hei taa te kaiarahi i te roopu Mana, a Hone Harawira, kaore ia i te tino whakapono ka angituu nga kokoraho a nga iwi. I tenei wa, kotahi anake te iwi kua whai i te mana ki to ratou takutai moana i raro i te ture.
Taharoa C Block
Kua hoko te tarahiti o Taharoa C Block i te whare umanga o New Zealand Steel i te takutai moana i te uru o Waikato. Ko te mahi a taua whare umanga, he maina me te taatari i nga onepu mo te konu e noho ana ki roto.
Kei te anga whakamua te marae o Te Rere
No ngaa rangi tata nei, i tutuki pai ngaa whakahoutanga ki te marae o Te Rere, i Oopotiki. E whakamihi ana te iwi kainga o Te Rere ki ngaa kaitaunaki-a-puutea o te Eastern Bay Energy Trust, kua roa nei e tautoko ana i te whakahoutanga o ngaa marae maha o taua rohe.
Kei hea nga kaipooti maori o Tauranga Moana?
Tekau ma rua paiheeneti noa iho, o ngaa kaipooti kua tukuna o raatou pooti mo te tangata hou ka whakakii i te tuuru Maori ki te kaunihera o Mauao. E mea ana a Yvonne Tatton, kaimahi o te tari pooti, kia kakama te whakahoki atu ngaa pooti i mua i te katinga o teenei pootitanga. Tokoono ngaa kaiwhakataetae mo teenei tuuru, Ko Carlton Bidois, Antoine Coffin, Matire Duncan, Paora Paul Martin, Matemoana McDonald me Christopher Stokes. Ka kati te waa ki ngaa kaipooti hei te tekau ma tahi o ngaa raa o teenei marama.
!["p_facebook"]("/site/uma/images/story_img/facebook.jpg")
& !["p_twitter"]("/site/uma/images/story_img/twitter.jpg")
Copyright © 2017, UMA Broadcasting Ltd: www.waateanews.com
RELATED NEWS
