March 29, 2017
Tuuru Maori motuhake mo te kaunihera a rohe o Te Papaioea
Tuuru Maori motuhake mo te kaunihera a rohe o Te Papaioea
Kei te tuku patapatai te Kaunihera-a-rohe o Te Papa-i-o-ea ki te hapori, mena ra e tautoko ana ratou i te whakaaro kia whakatuuria etahi tuuru Maori motuhake ki te Kaunihera hei te tau rua mano tekau ma iwa. Hei taa te kahika a Grant Smith, e tika ana kia kitea nga kanohi matatini o te hapori ki runga i te Kaunihera.
Ko te Kermadecs he take nui me aata aronuitia e te Kawanatanga
Ko te apure taimoana ki Rangitaahua tetahi take nui hei whakatau ma te Kawanatanga i tenei tau, ahakoa ko wai te Kawanatanga. Koira taa te Minita Whakawhanake Maori taa Te Ururoa Flavell. I korero a Flavell ki te Hui Taumata mo nga rawa ika Maori i tuu ki Tamaki Makaurau inanahi, a, hei taana, tata nei te RTM te whakarere i te Kawanatanga, na te mea, kaore te Kawanatanga i paku korero ki nga iwi i mua i taa ratou whakatau kia whakatuuria taua apure. Hei taana, waimarie tatou i te kaha o Te Ohu Kaimoana ki te tohe me te kaha o te peremia tuarua i taua wa, ara, o Bill English ki te kii atu, taihoa ake, me whakataarewa i tenei kaupapa.
Ko te tarutaru tetahi o nga paakinotanga hauora nui a te maori
Mena e whai whakaaro ana te Kawanatanga ki te whakamama ake i nga ture tarutaru, me matua whai whakaaro ki te paanga mai o tera momo whakatau ki te hauora o te iwi Maori. Hei taa Ross Bell o te Tuapapa Tarutaru, kei te marama haere te Kawanatanga, kaore te pakanga ki nga tarutaru i te whai hua, a, ko nga Pirihimana tetahi roopu e kii ana ki a ratou, me whakamama ake i nga ture. Heoi, ko tetahi patai nui hei whakautu ake, he aha te paanga mai o te whakamama i nga ture tarutaru ki te hauora Maori.
He hui nui ki te marae o Pipitea
Mo te wa tuatahi kua tuu tetahi o nga hui a te Kaunihera o Te Whanganui-a-Tara ki runga i te marae o Pipitea. Na to ratou taenga atu ki reira inanahi, i renarena ano ai te taura here i waenganui i te Kaunihera, Taranaki Whanui me Ngati Toa Rangatira. Hei taa te kahika, a Justin Lester, i waitohu waikanaetanga ratou ko nga iwi, kia kaha ake ai te whai waahi o nga iwi ki nga whakatau a te Kaunihera. Hei taana, he ara whakamua tenei e whanake ake ai te ohanga Maori, otira, te ohanga hoki o Te Whanganui-a-Tara.
Trade Training ki Tamaki Makaurau
Neke atu i te toru rau uri Maori kua whakawhiwhia ki etahi karahipi kia timta ai ratou ki te aruaru i waa ratou tohu i roto i nga kaupapa hanganga. Hei taa Kirk Sargent, tumu whakahaere o te hotaka Maori and Pasifika Trade Training, ma enei karahipi nga tauira e awhina ki te patu i te utu mo te whai tohu hanganga ki roto i nga kura matauranga pera i te Kura Wananga o Manukau, te Kura Wananga o Wairaka me Te Wananga o Aotearoa
Ka anga whakamua tonu a Ngati Paoa
Me whakatika tatou i te pohehetanga, kaore te hokotanga o tetahi papa reehia i te rohe o te Wai o Mokoia, ara, o Pt England i te hangai ki te whakataunga tiriti a Ngati Paoa. Koira taa te Minita Whakawhanake Maori, taa Te Ururoa Flavell. E mea ana a Reipa, ka pooti whakahee ratou ki te pire e hokona atu ai tera papa rehia ki a Ngati Paoa, heoi, hei taa Flavell, kaore ia i te paku marama he aha a Reipa e whakahee ai, me te aha, i te ahua nei, kaore a Reipa i te paku marama, he wahanga tenei o te whakataunga tiriti a Ngaati Paoa.
Copyright © 2017, UMA Broadcasting Ltd: www.waateanews.com