Tarutaru hei rongoaa

Tarutaru hei rongoaa

Ko Te Taitokerau te waahi tika hei whakamatautau i te tarutaru hei rongoaa. Koira taa te mangai torangapu o taua rohe, taa Kelvin Davis. Hei taa te rangahau i whakahaerehia i te raumati nei kia kite ai he aha nga take nui ki nga taangata o te Tai Tokerau, ko nga take whare, ko nga take whai mahi me nga take e pa ana ki te kino o te taimiri i rewa ake ki runga. Hei taa Davis, he ruarua noa iho nga turanga mahi ki te rangai ngahere me te rangai hii ika i Te Tai Tokerau, no reira, e tika ana kia auaha nga whakaaro, ka whakatipu ai pea i te tarutaru hei rongoa.

Te Ture Whakahaere Rawa

Hei te ra nei horahia atu ai e tetahi o nga komiti whiriwhiri o te whare paaremata taa ratou purongo e pa ana ki nga panonitanga ki te Ture Whakahaere Rawa. Kei te korero tonu te Kawanatanga ki te RTM, me pehea rawa te ahua o taua ture. Hei taa te Minita i nga take Taiao, a Nick Smith, e whakapae ana ia ka puta te ihu o te pire e panoni ana i te Ture Whakahaere Rawa a tera marama, a, ma te tautoko a te RTM e puta ai.

Whakaora i a Kaikoura

Kei te raru tonu te taha ohanga o te rohe o Kaikoura whai muri iho i te ruu whenua i haukerekere ra i taua takiwaa ra. Tekau ma whitu miriona taara kei te tiitarihia e te Kawanatanga ki Kaikoura, kia ora tonu te rohe-a-ohanga nei. Hei taa te Minita i nga Take Ohanga a Simon Bridges. kei te tukuna he putea ki te rohe, kia puta tonu ai te ihu o te hunga o taua hapori.

United Airlines noho ki Te Puea marae

E rima tekau ma whitu pahihi no te Umanga Waka Rererangi o United Airlines i noho ki te marae o Te Puea mo te po i tera wiki, na te whakakorenga o taa ratou rerenga me te korenga o taua Umanga i kite hootera i Tamaki e watea ana ki a ratou. I waea atu a United Airlines ki te marae, a, i whakaae te marae kia noho ratou ki te wharenui mo te po. Na Untied Airlines te marae i utu mo te whakamanuhiri i aua taangata.

Rongoaa patu rewharewha

Kua rewa te kaupapa e whai ai tatou i te rongoaa patu rewharewha mo te takurua e kainamu mai nei. Kei te tino whakatenatenahia tatou o te ao Maori ki te whai i taua rongoaa, ka puuwerohia mai ki o tatou tinana. Hei taa Taakuta Matire Harwood, e kaha ana te kitea o nga momo mate puukahukahu i roto i a tatou o te ao Maori, pera i te mate huangoo, no reira, ma whai i te rongoaa rewharewha mei kore e araihia atu taua mate hei tenei takurua.

Po Tohu Kaipakihi Maori

Kei te whakatata atu ki te waa e tuu ai te Po Tohu Kaipakihi Maori, ara, te Aotearoa Maori Business Leaders Awards. Ko te Whare Wananga o Tamaki te kaimanaaki i te hui, a, ko nga kaiwhiwhi tohu i nga tau o mua, ko Ngarimu Blair, Jamie Tuuta, Miriana Stephens, Mavis Mullins, Sir Ralph Norris, me Ian Taylor tae atu ki nga Ratonga Pakihi pera i a Ngai Tahu Holdings, Tuaropaki Trust and Wakatu Incorporation.

Follow us on &

Copyright © 2017, UMA Broadcasting Ltd: www.waateanews.com

RELATED NEWS

Te Arawa saxophonist silenced as Minarapa Mitai-Ngātai mourned Resource created for Maori history courses Fish quota model copied for water