Listen Now: 
Nga keenge me te Kawanatanga
Me kimi ara te Kawanatanga e mahi tahi ai ratou ko nga keenge, hei aha te whai kia korehaha era roopu i te mata o te whenua. Koira te karanga a te Minita Whakawhanake Maori a Te Ururoa Flavell. Kua tahuri te Kawanatanga ki te pepehi i nga keenge, ara, kua aukati te Manatu Hauora i te putea ki te Hotaka Hauora a Te Ope Whakaora ratou ko te maapu Mangaru hei patu i nga whakapoauau i waenganui i nga whanau. Hei taa Flavell, mai ra ano nga keenge e paihere ana i te whanaungatanga i waenganui i aratou, a, kaore e taea era herenga, e hia ngahuru tau te tawhito, te wetewete.
Whakatuu whare ki te papa taatahi o Te Arai
Kei te tautoko a Aotearoa Tuatahi i te hunga o Mangawhai e whakahee ana i te hiahia o Te Uri o Hau ki te whakatuu whare ki te papa taatahi o Te Arai. Kua ata whakatikatika te iwi i taa ratou rautaki whakatuu whare kia kore ai nga rauwiringa kaiao o taua papa taatahi e raru. No tera wiki i whakaae ai te Minita i nga take Putea a Steven Joyce ki te whakatuu huarahi hou ki te waahi e tu ai nga whare, engari, hei taa te mangai torangapu mo te Raki, a Winston Peters, kaore a Joyce i korero ki te hapori o Mangawhai i te tuatahi, a, kei te he tera.
Te ahi ki Otautahi
Kei te huaranga haere Te Rakau Whakamaru i nga taangata i nga whare wha tekau i nga karahiwi e tata ana ki Otautahi, kei wera ratou, otira, o ratou whare i te ahi e mumura ake ana i reira. E ai ki nga korero o te wa, he ahi tino uruwehi, he ahi tino whakamataku, he ahi hoki kaore e taea e nga kaipatu ahi te whakatuoi, i tenei wa.
Whakatuu apure taimoana ki Rangiataahua
Kei te whakahee tonu Te Ohu Kaimoana i te hiahia o te Kawanatanga ki te whakatuu apure taimoana ki nga moutere o Rangitaahua, ahakoa kua kitea he koiora hou i taua takiwa moana. Hei taa Malcolm Clark o Taihoronukurangi, ko te kitenga o aua koiora hou tetahi taunakitanga nui e tuu ai he apure taimoana ki Rangitaahua. Heoi, hei taa te Minita Whakawhanake Maori a Te Ururoa Flavell, mena e takahi ana tera apure taimoana i nga maataapono o te Ture Rawa Ika o te tau iwa tekau ma rua, ka whakahee te RTM i te kaupapa.
Tuuru Mauao Maori
Tokoono nga taangata kua karawhiu i o ratou ingoa ki te kowhiringa pooti motuhake mo te tuuru o Awanui Black i runga i te Kaunihera Taiao o Te Waiariki, ara, mo te tuuru Mauao Maori. I mate a Black i te mutunga o tera tau. Ko Carlton Bidois, Antoine Coffin, Matire Duncan, Paora Martin, Matemoana McDonald me Christopher Stokes nga kaitono. Hei te tekau ma tahi o Paengawhawha ka mutu te waa pooti.
Rima tau o te ru whenua nui i Otautahi
Hei tera wiki whakamaumaharatia ai te rima tau i te ru whenua nui i Otautahi i mate ai te kotahi rau, waru tekau ma rima taangata. Hei tohu i te matenga o era taangata ra, ka huraina he tohu whakamaumahara okawa ki a ratou, a, na Ngai Tahu te pounamu mo taua tohu i koha. Hei taa Tui Falwasser, he tohu aroha te pounamu, na te Runanga o Makaawhio. Na Caleb Robinson te pounamu i whakairo.
Te tukinotanga o nga tamariki
Kei te tautoko Te Pou Matakana i te karanga kia whakatewhatewhahia te tukinotanga o nga tamariki i raro i te maru o nga tari Kawanatanga i nga tau o mua. Hei taa Merepeka Raukawa-Tait, toihau o te Pou Matakana, tokomaha nga taangata e maharahara ana ki te hiahia o te Kawanatanga ki te tahitahi i tenei kaupapa ki raro i te whaariki. Hei taana, taarake ana te kite atu, i tukinohia he tamariki, no reira, toia mai nga korero tika i te rua kia whitikina e te ra.
!["p_facebook"]("/site/uma/images/story_img/facebook.jpg")
& !["p_twitter"]("/site/uma/images/story_img/twitter.jpg")
Copyright © 2017, UMA Broadcasting Ltd: www.waateanews.com
RELATED NEWS
