Listen Now: 
Whakatuu papa mo Te Wananga o Aotearoa
E whai whakaaro ana Te Wananga o Aotearoa ki te whakapuare pekanga hou ki te tonga o Tamaki. Hei taa te Tumuaki o te Wananga, a Jim Mather, i tenei wa kei Mangere te papa o te Wananga o Aotearoa, engari, e korero ana ia ki te Komihana Whare Wananga o te motu mo te whakatuu papa ano ki Manukau, Manurewa, Papakura ranei.
Whakakore te ingoa Auckland
Ahakoa te pai o te Ahurei Herenga Waka, kaore tonu a Tamaki Makaurau i te whakanui i te hiitori Maori i roto i nga kaupapa mo tona ra huritau. Koira taa tetahi o nga mangai matua o Ngati Whatua, taa Naida Glavish. Hei taana, e tika ana kia tino mohio nga taangata katoa e noho ana ki Tamaki, na wai te whenua i koha kia tuu ai te whaitua nui o te motu. Hei taana ano, me whakakore haere tatou i te ingoa Auckland, kia toituu ai te ingoa Tamaki Makaurau mo te rohe.
Metiria Turei mo Te Tai Tonga
Kaore te mangai mo Te Tai Tonga a Rino Tirikatene o Reipa, i te paku maharahara ki te urunga o te kaiarahi i Nga Kakariki, ara, o Metiria Turei ki te whakataetae mo taua turu hei te kowhiringa pooti e tu mai nei. Hei taa Tirikatene, mena e hiahia ana koe kia toa koe i roto i nga turu Maori, me whakawhanaunga atu ki nga ringa raupaa o te hapori, a, koia taana mahi i tenei wa, ahu atu ki te ra pooti.
E kore e hono a Maori me Mana
Ka mahi tahi, engari, e kore e hono. Koira taa Hone Harawira, kaiarahi i te roopu Mana ki nga kohimuhimu e rere ana i te takiwa mo ratou ko te RTM i tenei tau pooti. E hiahia ana a Harawira kia waiho e te RTM te turu o te Tai Tokerau ki a ia, kia pai ai tana whawhai ki a Kelvin Davis o Reipa. Heoi, hei taa Harawira, i roto i nga whiriwhiringa korero i tenei wa, kei te kaha nga roopu e rua ki te whakatairanga i aa raua tuu motuhake, ahakoa te hiahia kia mahi tahi.
!["p_facebook"]("/site/uma/images/story_img/facebook.jpg")
& !["p_twitter"]("/site/uma/images/story_img/twitter.jpg")
Copyright © 2017, UMA Broadcasting Ltd: www.waateanews.com
RELATED NEWS
