Listen Now: 
Peremia ki Orakei mo te ra o Waitangi
Kei te haere te peremia ki Orakei mo te ra o Waitangi. Kaore a Bill English i te whakaae ki te haere ki te waahi i waitohua ai te Tiriti, ara, ki Waitangi tonu, he kiriweti noona ki nga whakahaere i runga i te marae o Te Tii. Heoi, kua whakaae ia ki te tono a Ngati Whatua Orakei kia haere ki taa ratou parakuihi ki Orakei Marae, katahi ka heke iho ki te whanga o Okahu ki te matakitaki i nga ngahau o te ra.
Te Kawanatanga me te TPP
Kaore ano tenei Kawanatanga kia paku marama tiahoaho ki te aha, ahakoa te tini o nga whakahee e pa ana ki te TPP. Koira taa te Ahorangi Ture o te Whare Wananga o Tamaki, taa Jane Kelsey. Hei taana, i kite marika ia i nga hapa i roto i taua whakaaetanga tauhokohoko, i mua noa atu i taa te perehitini hou o Amerika, ara, i taa Donald Trump aukati i te waahi ki a Amerika i roto i taua whakaaetanga inanahi. I tino whakaheengia hoki taua whakaaetanga e te tokomaha o nga Maori, engari, mo te taringa whakarongo a te Kawanatanga, auare ake.
Academy Awards te kiriata Moana
Kua whai waahi te kiriata Moana ki nga tauwhainga o te whakataetae Academy Awards. Kei roto a Moana i te whiringa whakamutunga mo te tohu waiata o te tau me te whiringa whakamutunga mo te tohu kiriata pakiwaituhi o te tau.
He mihi ki a Percy Tipene
Kei te mihi tetahi o nga kaihautu matua o te roopu Te Waka Kai Ora ki a Percy Tipene o Ngati Hine i mate i te wiki nei i te ikura roro. Hei taa Nick Roskruge o Te Whare Wananga o Te Kunenga ki Purehuroa, ko Tipene te pou o te kaupapa Te Waka Kai Ora, a, mei kore ake ia, kua kore i tuu i te tau rua mano i te pa o Ratana.
Whakatu whare ki Kaikoura
Kei te whai whakaaro te Tarahiti o He Toki ki te mahi tahi ki a City Care me JFC ki te whakatuu ano i nga whare o Kaikoura i papahoro iho i te wa o te ru whenua. Hei taa Kym Hamilton, Tumu Whakahaere i te Tarahiti o He Toki, no te tau nei i uu mai ai te rima tekau tauira hanganga hou ki taa ratou hotaka hei whakangungu ma ratou, no reira, kei waenganui i a ratou te tini o nga tauira whai pukenga e watea ana ki te awhina i nga whanau o Kaikoura.
Aukatihia nga waka ki te tihi o Maungakiekie
Hei nga wiki tata nei, ka aukatihia te haere a nga waka ki te tihi o Maungakiekie. Kia mana tera, katahi te Kahui Maunga Tuupuna o Tamaki ka tahuri ki te aukati i te haere a nga waka ki nga kotihi o Maungarei, Owairaka, Puketapapa me Takarunga. Hei taa Paul Majurey o te Kahui, ma enei whakaritenga hou e rahui nei i nga waka ki era maunga, ka haumaru ake te hunga hikoi, ka haumaru hoki te mana me te tapu o aua maunga.
!["p_facebook"]("/site/uma/images/story_img/facebook.jpg")
& !["p_twitter"]("/site/uma/images/story_img/twitter.jpg")
Copyright © 2017, UMA Broadcasting Ltd: www.waateanews.com
RELATED NEWS
