Listen Now: 
December 21, 2016
Pierre Tohe ki roto o Tainui Group Holdings
Waatea Team
Posted On December 21, 2016
Pierre Tohe ki roto o Tainui Group Holdings
Kua whai mahi a Pierre Tohe ki roto o Tainui Group Holdings. Ko Tohe te Tumu Whakarae Maori i te Whare Tahua o BNZ i nga tau nei, a, hei taana, e rikarika ana ia ki te mahi ma tona iwi. Hei taa te tahuhu rangapu o Tainui Group Holdings a Chris Joblin, ko tetahi o nga kawenga nui a Tohe, he whakamatautau i etahi ara hei takahi ma Tainui e piki ai te uara o tana tahua putea.
Nga maharahara a Meka Whaitiri
Me ukui e te RTM ta raua tautoko i nga panonitanga ki te Ture Whakahaere Rawa. Koira te karanga a Meka Whaitiri o Reipa. E ai ki nga korero, kua tuhi reta te RTM ki te Kawanatanga, e whakararangi ana i o raua maharahara ki etahi o nga panonitanga ki taua ture. Hei taa Whaitiri, kei te takahi etahi o nga panonitanga nei i nga matapono o te RTM.
Whiwhi a Taakuta Amanda Black i te Marsden Fund
Kua whai putea a Taakuta Amanda Black o Te Whare Wananga o Waitaha i te Marsden Fund, hei awhina i a ia ki te rangahau, me pehea tatou e aukati ai i te urutomotanga mai o nga kiirearea me nga koiora kino ki konei ki te patu i to tatou taiao, penei i te mate kauri dieback. Ka ata tirotiro ia i nga tikanga Maori me nga tikanga Pakeha, mei kore e kitea he hanumitanga e pakari ake ai ta tatou arai atu i nga kaipatu i to tatou taiao.
Ngati Maru whakataunga tiriti
E ai ki a Ngati Maru, iwi no te raki o Taranaki, e hiahia ana ratou ki etahi o nga whenua o te Papa Atawhai hei whakaea i ta ratou whakataunga tiriti. Ko te nuinga o taua whenua e karapoti ana i te awa o Whanganui. Hei taa Anaru Marshall o Ngati Maru, kua hui ratou ki nga mangai o te Kawanatanga me nga mangai o Te Papa Atawhai ki te whakaatu atu i nga whenua e hiahia nei ratou.
Nuk Korako mo Port Hills
Kua tohua ano a Nuk Korako hei mangai mo Nahinara ki te rohe o Port Hills hei te kowhiringa pooti o te motu a tera tau. Ka whakataetae ia ki te kaipupuri i taua turu, ki a Ruth Dyson o Reipa. Kei te pito whakatetonga o Otautahi te rohe pooti o Port Hills.
Taapoi me te ahumoana o Murihiku
Ko te taapoi me te ahumoana. Koira nga pou o te rautaki ohanga o te rohe o Murihiku, a, hei taa te Minita Whakawhanake Maori a Te Ururoa Flavell, he wahanga nui to nga iwi i roto i taua rautaki.
Aukatihia nga waka ki te tihi o Maungakiekie
Hei tera tau ka aukatihia te haere a nga waka ki te tihi o Maungakiekie. Kia mana tera, katahi te Kahui Maunga Tuupuna o Tamaki ka tahuri ki te aukati i te haere a nga waka ki nga kotihi o Maungarei, Owairaka, Puketapapa me Takarunga. Hei taa Paul Majurey o te Kahui, ma enei whakaritenga hou e rahui nei i nga waka ki era maunga, ka haumaru ake te hunga hikoi, ka haumaru hoki te mana me te tapu o aua maunga. Hei taana, tokomaha nga taangata o te hapori e tautoko ana i te rahuitanga o nga waka i nga tihi o era maunga.
Nga karahipi Kia Ita
Kei te rere te karanga a Nga Pae o Te Maramatanga me Te Taura Whiri kia tono nga tauira tohu paerua, tauira tohu kairangi hoki i nga karahipi Kia Ita. E eke ana te uara o nga karahipi e ono nei, ki te rua tekau mano taara, engari, me hangai te kaupapa o te tuhinga roa ki te whakarauoratanga o te reo, ki te Reo Maori ranei. Hei taa Ahorangi Tracey McIntosh o Nga Pae o te Maramatanga, ko te tumanako, ma enei karahipi ka tuuperepere te mohio ki nga kaupapa whakarauora reo. Hei te mutunga o te marama o Huitanguru ka kati te wa tuku tono.
!["p_facebook"]("/site/uma/images/story_img/facebook.jpg")
& !["p_twitter"]("/site/uma/images/story_img/twitter.jpg")
Copyright © 2016, UMA Broadcasting Ltd: www.waateanews.com
RELATED NEWS
