Katia a Manurewa marae mo te hunga kainga kore

Katia a Manurewa marae mo te hunga kainga kore

Kei te katia e te marae o Manurewa taana kaupapa whakaruruhau i te hunga kainga kore i te ra nei, engari, katahi tonu nei te Kawanatanga ka panui mai i te korero, kei te whakapaua e ratou te toru rau miriona taara ki te whakatuu whare mo te hunga kaore o ratou kainga. E hanepii ana te hinengaro o te mangai torangapu o Manurewa a Louisa Wall ki tenei tu ahuatanga me te patai ake, he aha te take e kore nei te Kawanatanga e whangai putea ki nga marae pera i a Manurewa, kia haere tonu ai taa ratou mahi.

Te maina i nga onepu o Paatea

Kua puta te whakatau a te Kooti Taiao e pa ana ki te hiahia o Trans Tasman Resources ki te maina i nga onepu i te takutai moana o Paatea. Hei taa te Kooti, me whaaki a Trans Tasman Resources i nga taipitopito katoa o taua rautaki mo te maina i aua onepu. I haere a Ngati Ruanui ki te Kooti ki te wero i te hiahia o taua umanga kia kaua e whaaki i te katoa o nga taipitopito. Hei taa Debbie Ngarewa-Packer o Ngati Ruanui, no te Environment Protection Agency hoki tetahi wahanga nui o te hee i tae ai tenei take ki te Kooti, he tata rawa no taua ratonga ki te umanga Trans Tasman Resources.

Perehitini hou o Amerika

Kua timata a Amerika ki te pooti i to ratou perehitini hou. No te ata nei a Hillary Clinton i tuku ai i tana pooti, a, kua pera hoki a Donald Trump. E ai ki nga matanga torangapu, ko te kaitono ka toa ki roto i nga rohe o North Carolina me Florida, koia ka perehitini.

Ora tonu nga turanga mahi ki MTS

Kei te whakahee te tahuhu rangapu o Whakaata Maori, a Paora Maxwell, i te heitara e kii ana, ka kore mahi etahi i te nukuhanga o Whakaata Maori ki te ra whiti o Tamaki. Hei taana, ka ora tonu nga turanga mahi katoa

Nga konohete o te roopu Maori showbands

Kua whakataarewahia nga konohete a nga roopu waiata Maori o mua, ara, a nga Maori showbands. Hei taa te kaihautuu i te roopu Maori Volcanics a Mahora Peters, na te matenga ohorere o tetahi o nga whanau o te roopu Maori Hi Fives i whakaaro ake ai ratou kia whakataarewahia nga konohete i tenei marama, ki te marama o Huitanguru a tera tau.

Ngati Rehia e tautoko ana i a Tuhoronuku

Kua tahuri te hapu o Ngati Rehia ki te whakatenatena i te Karauna kia mahi tahi me Tuhoronuku kia oti ai te tono raupatu a Ngapuhi. Hei taa te mangai mo Ngati Rehia a Te Huranga Hohaia, whitu tekau ma ono oorau o te iwi i pooti ki a Tuhoronuku hei mana mo ratou ki te amo tiitoko i te tono raupatu a Ngapuhi, no reira, kaore i te roopu o Te Kotahitanga te mana ki te korero mo tenei take.

Mangere Budgeting Services te whakahaere kaupapa hokohoko

Kei te whakahaere kaupapa hokohoko te Tarahiti Mangere Budgeting Services ki roo wharau waka kia haere tonu ai taana mahi. Hei taa te kaiwhakahaere i te ratonga nei, a Darryl Evans, kua whai putea ratou kia ora tonu ai ratou ki Mangere me Otara, engari, kaore i whai putea kia tuwhera tonu ai te pekanga o te ratonga ki Tuuaakau.

Kia nui ake te putea mo nga hotaka reo Maori

E hiahia ana te Upoko hou o Te Mangai Paho kia nui ake te putea ki nga hotaka reo Maori. Hei taa Larry Parr, i tona tikanga kia haere te ono tekau oorau o te putea a te Mangai Paaho ki nga hotaka reo Maori, engari, kaore era hotaka i te whai i te ono tekau oorau o te putea. Hei taa Parr ano hoki, ko tona hiahia kia auaha ake te ahua o nga hotaka reo Maori.

Follow us on &

Copyright © 2016, UMA Broadcasting Ltd: www.waateanews.com

RELATED NEWS

Te Aronui i a Perehitini Trump Ngā Whakatūpatotanga Mate Karauna Education innovation rewarded Ihumatao protest heads for UN