October 30, 2016
Te karanga a Peeni Henare ki a Whakaata Maori
Te karanga a Peeni Henare ki a Whakaata Maori
E karanga ana te mangai torangapu mo Tamaki Makaurau a Peeni Henare, kia whaaki mai te Poari o Whakaata Maori i nga taipitopito mo nga panonitanga ki a Whakaata Maori. Kei te poroa etahi turanga mahi i roto i a Whakaata Maori, a, hei taa Mike Rehu, kei te whakawhaaiti ratou i etahi turanga mahi kia pai ai taa ratou whakatutuki i taa ratou kaupapa kia puta i a ratou etahi hotaka kounga nui hei matakitaki ma te haarakerake. Hei taa Henare, kei te maahorahora haere nga maanukanuka e pa ana ki a Whakaata Maori, otira, ki te huarahi e takahia ana e ia, me tana ngoikoire ki te whakatinana i te moemoeaa i whakatuuria ai ia, tekau ma rua tau ki muri.
Howie Tamati hei mangai mo te RTM Te Tai Hauauru
Kua tohua te kaitakaro riiki o mua, a Howie Tamati hei mangai mo te RTM ki te turu torangapu o Te Tai Hau-a-uru. No Ngati Mutunga, Te Atiawa me Ngai Tahu a Tamati, a, i te whakataetae ia ki te tahuhu rangapu o Ngati Ruanui, ki a Debbie Ngarewa-Packer mo te koopoutanga nei. Hei taa te perehitini o te RTM, a Tukoroirangi Morgan, he tangata rongonui a Tamati, a, kei a ia te mana whakaaweawe e pooti ai te marea ki a ia. Kei a Adrian Rurawhe o Reipa te turu o te Tai Hau-a-Uru i tenei wa.
Piki te kitea o te P e nga apiha o te mana tauarai o Aotearoa
Kei te tino piki te kitea o te P e nga apiha o te mana tauarai o Aotearoa, ara, Customs. E ai ki nga korero, mai i te tau rua mano ma iwa, toru mano oorau te pikinga ake o te kitea o te P e ratou, e ninihi mai ana ki roto i tenei whenua. Mai i te marama o Kohitaatea i tenei tau, e toru rau, rima tekau ma whitu kirokaramu o te P kua kitea, kua raupatungia e nga apiha o te mana tauarai.
Ahorangi Selwyn Katene hei upoko o te Pokapuu Kaiarahitanga Iwi Taketake
Kua tohua a Ahorangi Selwyn Katene hei upoko o te pokapuu hou ki te whare wananga o te Kunenga ki Purehuroa, e kiia nei, ko te Pokapuu Kaiarahitanga Iwi Taketake. Hei taa Katene, e tika ana kia ako pukenga kaiarahi te iwi Maori i etahi atu iwi taketake o te ao, otira, kia tohatoha hoki tatou i o tatou pukenga, mohiotanga kaiarahi ki a ratou. Hei taa Katene, he pokapuu hou tenei, no reira, ko taana mahi tuatahi he tuitui i te whanaungatanga i waenganui i nga iwi o te motu, katahi ka tuitui i taua whanaungatanga ra ki nga iwi taketake o te ao.
Karakia a Ngati Tamaoho ki Karaka
Kua whakahaere karakia a Ngati Tamaoho ki runga i to ratou whenua ki te takiwa o Karaka i te Tonga o Tamaki Makaurau, e tuu ai te kotahi mano whare hou ki reira. Waru tekau ma wha heketea o te tutanga whenua e kiia nei, ko Auranga, ka whakawhanakehia hei papa whakatuu whare. Kei te mahi tahi te umanga Charles Ma ki a Ngati Tamaoho, i roto i tenei kaupapa.
Tautoko a Peeni Henare i a Hurimoana Dennis
E tautoko ana te mangai torangapu mo Tamaki Makaurau a Peeni Henare i te heamana o te marae o Te Puea Marae, i a Hurimoana Dennis, ahakoa kei te hamenetia ia e nga pirihimana mo te kaahaki rangatahi. Hei taa Henare, kua tino whakapau kaha a Hurimoana Dennis ki roto i nga hapori o Tamaki mo te hia tau, he tangata houtupu, he tangata marae. No te wiki nei i whakahee ai te Poari o te marae i te riihainatanga a Dennis.
Copyright © 2016, UMA Broadcasting Ltd: www.waateanews.com