Te Roopu Tekau o te roopu pakihi o Taranaki Whanui

Te Roopu Tekau o te roopu pakihi o Taranaki Whanui

Kua kauparehia atu e te Tarahiti o Port Nicholson te tono a nga kaitautoko i a Taa Ngatata Love kia panaia nga mangai o te Roopu Tekau, ara, o te roopu pakihi o Taranaki Whanui. I mauheretia a Taakuta Love i tera wiki mo te tahae i te kotahi ira kati rima miriona taara i te Roopu Tekau. Tokomaha nga uri o tona whanau i tae atu ki te hui-a-tau a te Tarahiti i te ra horoi nei, ki te taataa i nga mangai o taua Uepu. Heoi, hei taa te Toihau o te Tarahiti o Port Nicholson a Neville Baker, mena ka hara koe, ko te whare herehere te otinga, a, koia te ahua i paa ki a Taa Ngatata Love.

Nga waahine Maori ki te penapena putea

Kei te mahi tahi te Rangapu Whakawhanake Waahine Maori me te Westpac Massey Fin-Ed Centre ki te whakapiki i te matauranga o nga waahine Maori ki te penapena putea. Hei taa Pushpa Wood o te Rangapu, i whakahaere rangahau ratou i waenganui i etahi waahine Maori o te Tonga o Tamaki, a, e rima tekau ma iwa oorau o ratou kaore i te penapena i tetahi wahanga kotahi o te putea ka whakawhiwhia ki a ratou ia wiki….ono tekau ma waru orau o ratou, kaore i te penapena putea mo te kaumaatuatanga.

Ngaruawahia P kore

E rua ra a Ngaruawahia e P kore ana, engari, kei te amaimai etahi o te rohe, kei pahuu te riri. No te ra horoi te maapu Tribal Huk i takatuu ai ki te pana i nga kaihoko P i te rohe o Ngaruawahia. Hei taa ratou, ki te noho tonu era kaihoko ki te rohe, ka rongo ratou i te whiu a te maapu Tribal Huk. Heoi, hei taa James Whetuu o te Poari-a-rohe o Ngaruawahia, ahakoa kua panaia te hunga hoko P mo tenei wa, e mataku ana etahi kei tuu te puehu, a taihoa ake nei.

Porotuu a nga takuta rangatahi apopo

E mea ana nga Ratonga Hauora-a-rohe, ka tiakina tonutia e ratou o ratou turoro, ahakoa te porotuu a nga takuta rangatahi apopo….toru mano, rua rau nga taakuta rangatahi ka kore e tae ki te mahi mo te wha tekau ma waru haora, he hoha no ratou ki te roa o o ratou haora mahi, me te iti o te utu…..Hei te whitu karaka i te ata apopo ka timata tenei porotuu a ratou, engari, hei taa nga Ratonga hauora-a-Rohe, ka riro ma nga taakuta tautohito nga turoro e tiaki.

Nukuhanga a Whakaata Maori

Kua tau te korero, kei te nuku a Whakaata Maori i Newmarket ki te huarahi o East Tamaki i te ra whiti rawa o te whaitua nui o te motu. Hei taa te Toihau o te Poari o Whakaata Maori a Georgina te Heuheu, nui rawa te utu reiti i te pau i a ratou ki to ratou whare ki Newmarket, tuia ki tena, i te rapu whare ratou e taea ai e ratou etahi taiwhanga papaho hou te hanga, tata ki nga huarahi matua me nga ara tereina, tata hoki ki nga kohanga reo, kura me nga marae. Hei te marama o Pipiri a tera tau, ka timata te nukuhanga.

He mihi ki a Helen Kelly

Kei te rere tonu nga mihi i nga Uepu Kaimahi Maori ki a Helen Kelly, moona i whitawhita tonu ai te ahi kaa o nga tika o nga kaimahi, puta noa i te motu. I mate a Kelly i tera wiki i te mate pukupuku ki nga puukahukahu, e rima tekau ma rua oona tau, engari, hei tenei wiki ka tuu tona uhunga. Hei taa Sharryn Barton o te Runanga o te Uepu Kaimahi Maori, E Tu, he whakaawe kaapara a Kelly mo te hunga ringa raupaa, a, i kaha ki te whawhai mo nga tika o nga kaimahi ngahere i mate i te waahi mahi, tae atu ki nga kaimahi kaarawarawa miiti me o ratou whanau.

Follow us on &

Copyright © 2016, UMA Broadcasting Ltd: www.waateanews.com

RELATED NEWS

Media Release: Lizzie Marvelly appointed as Director, Rotorua Museum Te Whare Taonga o Te Arawa Te Arawa saxophonist silenced as Minarapa Mitai-Ngātai mourned He hakari nui mo te hunga rawakore