Purongo Te Whakakotahitanga o te Ao

Purongo Te Whakakotahitanga o te Ao

Kei te aro kore te Kawanatanga ki te purongo a Te Whakakotahitanga o te Ao e pa ana ki nga tika o nga tamariki. Koira taa te roopu Peace Movement Aotearoa. Hei taa te Minita Whakahiato Ora, a Anne Tolley ki tetahi komiti o Te Whakakotahitanga i Geneva i tenei wiki, ehara i te mea, kotahi te rongoaa mo te tuakokatanga tamariki i roto o Aotearoa nei. Heoi, hei taa Edwina Hughes o te roopu Peace Movement Aotearoa, me mutu taa Tolley kaupare i te korero pono e kii ana, rua tekau ma iwa oorau o nga tamariki o tenei whenua e tuakoka ana, me te aha, he raru nui tera.

Te rautaki Ka Hikitia

E hiahia ana te kaikaute matua o te motu, a Lyn Provost kia hapai nga kura katoa o te motu i te rautaki Ka Hikitia, he rautaki i ata tuhia kia angitu ai nga tauira Maori i roto i te rangai matauranga. Kei te taataahia e etahi te rautaki Ka Hikitia, na te mea, he iti noa iho te whanaketanga o nga tauira Maori i raro i taua rautaki, heoi hei taa Provost, mena ka ata titiro ki nga kura e tino kokiri ana i nga maataapono o te rautaki, kei te tino angitu nga tauira Maori o aua kura ra.

Hui mo te Ratonga Whenua Maori

Kua tae atu nga hui mo te Ratonga Whenua Maori hou ki Turanga, a, ahakoa e kaumingomingo tonu ana nga whakaaro ki te mahi ka mahia e taua ratonga hou, e ai ki nga kaipupuri whenua Maori o te Tai Ra Whiti, ko to ratou hiahia kia waerea e taua ratonga te ara whakamua e noho mai ai te whenua hei oranga mo nga uri whakatipu. Hei taa Robyn Rauna o Ngati Porou, he mea nui ki a ratou kia kaha tonu te aroha o nga uri ki te whenua hei waiuu mo ratou. Ka tu te hui mo te Ratonga Whenua Maori hou ki Kaikohe i te ra nei, a, hei apopo ka mutu ki Kaitaia.

Petihana mo te taru rauhea hei rongoa

Kua tae atu tetahi roopu, ahua tokoiti nei, ki nga arawhata o te whare paaremata ki te kokiri petihana e whai ai nga turoro o tenei whenua i te taru rauhea hei rongoaa mo ratou. Tekau ma whitu mano taangata kua waitohu i te petihana, a, hei taa te kaiarahi i te Roopu Kakariki, a, Meteria Turei, ko te painga atu mena ka tukuna te mana whakatau e pa ana ki te whangai tarutaru ki nga turoro hei whakamahu mamae, ki nga taakuta, na te mea, ko ratou e mohio ana….hei aha te whakapaa ki nga kaitorangapu kia ture i a ratou.

6 miriona taara ki Te Kura Maori o Nga Tapuwae

Kei te whakahouhia ake te Te Kura Maori o Nga Tapuwae i te Tonga o Tamaki. Kua whai te whakahoutanga nei, i te ono miriona taara ano kia pai ai tana whakatuu akomanga hou ki runga i tona papa i Mangere. Hei taa te Minita i nga take Matauranga a Hekia Parata, na te taapiritanga o te ono miriona taara nei, ka eke te uara o te whakahoutanga ki te rua tekau ma tahi miriona taara.

Huritau kotahi rau tau mo nga Whare Whakamaumahara Hoia

Hei whakanui i to ratou huritau kotahi rau tau, kua whakatuuria e nga Whare Whakmaumahara Hoia he kaumaatua mo ratou, ara, ko Ronald Miki Apiti, ika-a-whiro no te pakanga i Vietnam kua whakauungia ki taua turanga. Hei taana, ko taana haepapa nui, he arahi i nga Whare Whakamaumahara Hoia i roto i taa ratou mahi, otira, i roto i taa ratou tauawhi i te ahurea Maori.

Follow us on &

Copyright © 2016, UMA Broadcasting Ltd: www.waateanews.com

RELATED NEWS

Climate plan – cut cars, cut cows, grow trees Te Arawa saxophonist silenced as Minarapa Mitai-Ngātai mourned No profit from misery says dry home doc