Listen Now: 
He huarahi taratara kei mua i a Hone Harawira ki te hoki ki Paaremata.
Koia te korero a Winston Peters rangatira o Aotearoa Tuatahi me tana mohio ehara i te huarahi maamaa te hokinga ki reira whai muri te ngahorotanga o to roopu.
Hai taa Peters, ko te huringa o te titiro a Harawira ki te hunga rawakore he tirohanga whakahirahira.
Konohete Kaingakore
Na to ratou haerenga ki te marae o Te Puea, kua tino rite mai te roopu waiata Sons of Zion mo taa ratou konohete hai tautoko i te hunga kaaingakore a tera marama.
Ka tuu ratou me etahi atu roopu whakarae ki te whare o te Studio Taamaki Makarau a tera marama.
Ko Music is Love te ingoa o te konohete ka tuu ki te rori o Karangahape, 55 taara te utu o nga tiikiti.
Korowai
Nau mai hoki mai ki te kaainga.
Koia te karanga a nga iwi o Te Wairarapa ki tetahi korowai i riro ki taawaahi kotahi rau tau ki muri.
Kua roa taua korowai e hanga ana ki te harakeke me te wuuru.
E takoto ana i Amerika, inakuaraa kua hokona e tetahi tangata o Whakatuu kaatahi ka hoko atu ki a Rangitaane o Wairarapa me Ngati Kahungunu ki Wairarapa.
Hai taa Maarama Fox o te Paati Maori kei te poowhiri te iwi kaainga i te korowai kua whakaiingoatia ko Hinemuka ki Te Aratoi i te raa nei.
Paangarau
Hangaia Te Urupounamu Paangarau mo Taatou.
Koia te hootaka paangarau kei te whakatairangatia e Ngai Tahu ki tetahi kura i Otautahi, me te aawhina o te Tari Maatauranga me te Whare Waananga o Massey.
Hai taa Minita Maatauranga a Hekia Parata he orite te tikanga whakaako o te hootaka paangarau nei me nga otinga papai ki tetahi atu hootaka ako i whakapaingia nga whanonga tamariki ki roto o Porirua.
Tikanga rorohiko
Ko Ngai Tahu te iwi kei te whakahono i nga tikanga rorohiko ki te reo Maori.
Kua mahi tahi te iwi me te roopu e kiia nei ko Code Club Aotearoa ki te whakaako i nga tamariki kura tuatahi ki te awhi i nga whakapono me te reo o to ratou iwi ma etahi hootaka ako
e mahingia ana ki te reo Maori.
Ma reira ka whakatupu i te mohiotanga o nga aakonga ki nga hoohonutanga o te whakahaere moohiohio, o te whakahaere rorohiko.
Hauora ipurangi
Kua whakatuuria he ratonga hou kia kore e mahue tetahi tamaiti ki tahaki.
E whakawhirinaki atu ana te Poari Hauora o Taranaki ki taua ratonga e meingatia ana he atamira kohi moohiohio mo te oranga o nga tamariki.
Ka whakarato taua atamira i nga korero mo nga tamariki koohungahunga i kohia ai e nga tapuhi whakawhaanau peepee hai tirohanga atu ma nga kaimahi hauora ki runga ipurangi.
Copyright © 2016, UMA Broadcasting Ltd: www.waateanews.com
RELATED NEWS
