Listen Now: 
Kaahore te kaawana e whakarongo ana ki nga aawangawanga o nga roopu e aatete nei i te pire Ture Whenua Maori.
Koia te korero a Bryce Lyall roia mo nga kaikereeme o te Taitokerau.
E hiahia ana ratou kia tere whakautu te kaawana i nga tohutohu a te Taraipiunara o Waitangi mo te pire hai a mua i tana whakaurunga ki roto o Paaremata.
Ka tae rawa te pire ki reira ka kaha kookiritia kia tau ai.
Kaahui Kaumaatua
Kua tuu tetahi roopu kaumaatua ki te whakahee i te whakaritenga o tetahi waahi raahui i te moana e karapoti ana i nga moutere o Rangitahua.
E kii ana a Taa Tiipene O'Reagan te rangatira o taua kaahui, mehemea ka raahuitia taua rohe moana, ka takahi i nga motika o te Maori ki te hii ika ki reira.
Hai taana ano, kei te haria te kaupapa ki te Kooti Teitei e Te Ohu Kaimoana.
Nga Rohe Maori
Ko Andrew Judd koromatua o Ngaamotu kei te kookiri i te karanga kia whakarerekee a Paaremata i te ture mo nga tuuru Maori ki nga kaunihera a rohe.
Kahore ano kia whakatuuria he rohe Maori ki raro i nga tikanga o naianei.
Kua whakaae a Minita Maori Te Ururoa Flavell ki te tono a Judd ki te tuku petihana ki a Paaremata mo te whakahuringa o te ture na te mea kua roa te Maori e herea ana ki nga tikanga huakore.
Piinono pati puutea
He moumou puutea te hoatutanga o te puutea ki nga piinono.
Ka nui te hoohaa o nga taone nui ki era hunga e pati ai ki nga taha huarahi, aa kei te kii etahi kua tae ki te waa ki te whakarite rautaki mauritau ki te whakatau i te raruraru.
Kaati kei te rangirua nga kaunihera me pehea e aawhina ai nga piinono me te mohio ko te moni te mea nui ki etahi.
Ehara kee ko te kai, ko te moenga, ko te whare ranei.
Etitia Akonga
Kua whakaritea ko tauira ture a Indiana Shewen o Te Atiawa me Ngati Mutunga hai etita aakonga o te tuhinga e kiia nei ko te Arotakenga Maori o nga Kaupapa Ture.
Ka titiro taua tuhinga ki nga kaupapa ture e paa ana ki a tatou te Maori.
Kei te whai haere tonu a Shewen i tana tohu ture i te Whare Waananga o Wikitoria.
Ko tana tumanako kia piki haere te whakaaetanga ki nga tikanga Maori i roto i nga kaupapa o te ture.
Copyright © 2016, UMA Broadcasting Ltd: www.waateanews.com
RELATED NEWS
