March 14, 2016
TPPA whakakino hauora
He whakaritenga te kirimana TPPA e whakatuma ai te hauora o te Maori.
Koia te taunaki korero kua whakatakotoria ki mua i te Taraipiunara o Waitangi e nga kaitono whakarae pera i a Ahorangi Jane Kelsey raaua ko Taakuta Papaarangi Reid.
Hei taa Reid, tera tonu pea ka rongo te hauora Maori i nga paanga o te pikinga utu ki nga pire rongoaa aa ka tautoko nga kirimana pera i te TPPA i te hunga.
Kei a ratou te nui ake o nga rawa, o nga rauemi.
Mauhere Maori
E tutuki pai ana te kaawanatanga i ana here ki nga Maori kei te whare herehere e mauheretia ana te korero a te Piriimia a John Key.
Koia tana korero ahakoa te kino o nga tatauranga o te waa e mea ana ko tatou te nuinga kei aua whare e noho ana.
Hai taa te Piriimia ano, mehemea ka haere ki te Whare Herehere ki Wiri Taamaki Makaurau, ehara i te mea ka noho noa iho nga mauhere, engari kei te ako puukenga ratou.
Arotake motika
Ka arotake i te mahi a Aotearoa mo te Tiriti o Waitangi me nga motika iwi taketake.
Koia te kaupapa ma te kaahui o te UN i tenei wiki ka titiro hoki ratou ki te whakakamupenetanga o nga whare herehere me nga paanga o te kirimana TPPA.
Ka whakaputa whakaaro te Kaahui o nga Rangatira a Iwi me etahi atu roopu mo nga take e paa ana ki nga motika toorangapuu e rongohia ana ki Geneva Uropi.
Kaakaahi i paea
Ahakoa te pukumahi a te haukaainga o Paatea, kiihai i taea te whakaora i tetahi kaakahi araa orca i paea ki uta.
Hai taa Debbie Ngaarewa Packer o Ngati Ruanui kaiarataki o nga mahi whakaora, i tae wawe nga rangatahi o Paatea me a ratou kaaheru ki te whakarewa i taua kaakahi, i te mutunga ka rahua.
Ngahere tawhito
He aawangawanga no etahi i te tonga o Taamaki Makaurau, kei tapahi tetahi ngahere tawhito i to ratou rohe kia hanga huarahi hou.
Ko nga puuriri kei taua ngahere i Manukau, no tuawhakarere e ai ki nga korero.
Kaati e mea ana te Manatuu Waka o Taamaki ka whakakapi ratou i nga raakau Maori e tuaina ai.
Tiakina nga kaipupuri whenua
Kaua e whakapeehi i nga kaipupuri whenua Maori o nga whenua iti.
Koia te tohutohu a Taraipiunara o Waitangi ki te Karauna mo te ture whakahou e whakaritea nei, kia maamaa ake te mahinga o nga whenua a iwi.
Hai taa te Taraipiunara ano, me anga whakamua te Karauna mehemea ka maarama mohio te Maori ki nga tikanga e whai atu.
Copyright © 2016, UMA Broadcasting Ltd: www.waateanews.com